Nashik | एटीएमची अदलाबदली करून पैसे काढणाऱ्या सराईतास अटक

नाशिक : एटीएमची (ATM) अदलाबदली करून खात्यातून परस्पर पैसे काढणाऱ्या संशयितास मुंबई नाका पोलिस ठाण्याच्या अधिकाऱ्यांनी निलंगा (जि. लातूर) येथून अटक केली. शैलेश शिंदगे (२२, रा. सातपूर), असे संशयिताचे नाव आहे. ७ मे २०२१ रोजी आडगाव येथील माजी सैनिक लहानू ठोंबरे हे पैसे टाकण्यासाठी बोधलेनगर येथील भारतीय स्टेट बँकेच्या (SBI) सीडीएम (CDM) आणि एटीएम हे एकाच ठिकाणी असलेल्या शाखेत गेले होते.

त्यांना सीडीएम मशिनमध्ये पैसे टाकण्यास अडचण येत असल्याने त्यांच्यामागे उभ्या असलेल्या संशयित शैलेश यांनी ठोंबरे यांना सीडीएममध्ये पैसे टाकून दिले. त्यानंतर हे पैसे बँक खात्यावर जमा झाले की नाही याची खात्री करण्यासाठी त्यांच्याकडील एटीएएम कार्ड व पीन नंबर मागवून घेतला. त्यानंतर शैलेश याने एटीएमची अदलाबदल केली. यानंतर त्याने ठोंबरे यांच्या खात्यातून वीस हजार रुपये काढून घेतले. फसवणूक झाल्याचे कळताच त्यांनी मुंबई नाका पोलिस ठाण्यात तक्रार दाखल केली.

मुंबई नाका पोलिस ठाण्याचे सहाय्यक निरीक्षक के. टी. रोंदळे यांच्या पथकाने या प्रकरणाचा तपास केला. गुप्त बातमीदाराने दिलेल्या माहितीनुसार संशयित शैलेश शिंदगे हा लातूर (Latur) जिल्ह्यातील निलंगा तालुक्यातील लोंढेनगर येथील मॉडर्न इंग्लिश स्कूल येथे असल्याचे सांगितले. त्यानंतर पथकाने थेट निलंगा गाठत संशयित शैलेश यास ताब्यात घेतले. त्याच्याकडे विचारपूस केली असता, त्याने यापूर्वीदेखील नाशिक (३), जालना (३), परभणी, नांदेड, ठाणे आणि मुंबई येथे अशा प्रकारचे गुन्हा केल्याची कबुली दिली. संशयित शैलेश यास न्यायालयात हजर केले असता, न्यायालयाने तीन दिवसाची पोलिस कोठडी सुनावली आहे. ही कामगिरी सहाय्यक निरीक्षक के. टी. रोंदळे, रोहिदास सोनार, अनिल आव्हाड, अप्पा पानवळ यांनी केले.