वाहतूक कोंडीने कोंडला श्‍वास; मनमाडकरांना रोजच मन:स्ताप

मनमाड (जि. नाशिक) : चांदवड- नांदगाव मार्गाच्या रस्त्याचे काम सुरू असल्याने पुणे- इंदूर राष्ट्रीय महामार्गावर (National Highway) तसेच शहरातील प्रमुख रस्त्यांवर नागरिकांना रोजच वाहतूक कोंडीचा (Traffic) सामना करावा लागत आहे. या वाहतूक कोंडीमुळे मनमाड शहराचा श्‍वास कोंडला जात असून, रोजच होणारी वाहतूक कोंडी सोडविण्यासाठी वाहतूक पोलिसांची नेमणूक करण्याची मागणी नागरिकांमधून होत आहे.

चांदवड- नांदगाव मार्गाच्या दुपदरीकरणाच्या काँक्रीटीकरणाचे काम सध्या सुरू आहे. नांदगाव मार्गाचे काम सुरू झाले नसले तरी चांदवड मार्गाचे काम मालेगाव चौफुलीपर्यंत आले आहे. सदर काम दुपदरी असले तरी एक पदरी काम होत असून, एक बाजूचा मार्ग वाहतुकीसाठी ठेवण्यात आला आहे. काही ठिकाणी दुपदरी काम झाले आहे, या कामामुळे चांदवड, नांदगाव आणि पुणे- इंदूर राष्ट्रीय महामार्गावर रोजच मोठी वाहतूक कोंडी होत असते. पुणे- इंदूर महामार्गावरून मोठ्या प्रमाणात अवजड वाहतूक होते. सतत वर्दळीचा मार्ग असल्याने या कोंडीमुळे वाहनधारकांना डोकेदुखीचा सामना करावा लागत आहे.

दररोज सकाळी आणि सायंकाळी वाहनांची गर्दी होते. अनेकदा गंभीर आजारी रुग्णांना घेऊन जाणाऱ्या रुग्णवाहिका देखील या कोंडीत अडकल्या जात असल्याने रुग्णाच्या जीवावर देखील बेतत आहे. त्यातच या मार्गावर कृषी उत्पन्न बाजार समिती असल्याने कांदा विक्रीसाठी आलेल्या शेतकऱ्यांच्या ट्रॅक्टरची गर्दी होते. तर नांदगाव मार्गाने इंधन कंपन्यांचे इंधन टँकर येत- जात असल्याने मोठी गर्दी असते. इंदूर- पुणे महामार्गावरून जड, अवजड वाहनांची वाहतूक होते. अशा वाहतुकीमध्येच घुसणाऱ्या वाहनांमुळे कोंडी निर्माण होते.