UAE Ashadhi Ekadashi: दुबईत रंगला विठूनामाचा गजर! यूएईमधील श्री गणेश मंडळ, शारजाह मंडळाचा पुढाकार

UAE Ashadhi Ekadashi : राज्यात आषाढी एकादशीनिमित्त हरिनामाचा गजर करीत होणाऱ्या दिंडी सोहळ्याला अनन्यसाधारण महत्व आहे. सातासमुद्रापारही विठुरायाच्या भक्तांनी यूएईमध्ये भावपूर्ण वातावरणात आषाढी महोत्त्सव साजरा केला.

आषाढी सोहळ्यामुळे संपूर्ण यूएई विठ्ठलमय झाली होती. यूएईमधील श्री गणेश मंडळ, शारजाह मंडळाने याकामी पुढाकार घेतला. (UAE Ashadhi Ekadashi vithu mauli in Dubai Initiative of Shree Ganesha Mandal Sharjah Mandal nashik)

दुबई येथील जे.एस.एस. प्रायव्हेट स्कूल, येथे आषाढी एकादशीचा हा सोहळा पार पडला. २०१६ पासून सुरू केलेला आषाढी एकादशी सोहळा कार्यक्रम दरवर्षीप्रमाणे यंदाही मोठ्या उत्साहात दुबईत आषाढी एकादशी साजरी करण्यात आला.

यूएईमध्ये असणाऱ्या मराठी माणसांच्या हृदयात आषाढी वारीची ओढ लागलेली असते. पालखीची सजावट, दिंडी, रिंगण, पखवाज, पारंपरिक पोशाख आणि टाळांच्या तालावर हरिपाठ, अभंग तसेच माउलींचा गजर, ज्ञानबा तुकारामांचा जयघोष अशा जल्लोषमय वातावरणात आषाढी एकादशी साजरी करण्यात आली.

हेही वाचा : Credit Card फसवणूक....काय घ्याल काळजी?

भाविकांनी फुगड्या आणि भक्तिनृत्य केले. श्री गणेश भजन मंडळामुळे नोकरीनिमित्त परदेशात वास्तव्य असताना आपण महाराष्ट्रात विठुरायाच्या पंढरीतच असल्याचा अनुभव सगळ्यांना आला.

सगळ्यांनी या सोहळ्याद्वारे यूएई सर्वधर्मीय देश असल्याचा अनुभव घेतला. युएईमध्ये ४५ अंश तापमान असूनसुद्धा बहुसंख्य वारकरी मंडळी जमली होती.

पाच तास चाललेल्या भक्तिमय सोहळ्यात सर्व भक्तांना, लहान मुलांना उपवासाचे पदार्थ, फळे आदी प्रसाद वाटप करण्यात आला. सोहळ्यासाठी श्री गणेश भजन मंडळ, शारजाह आणि आषाढी दिंडी ग्रुपमधील सर्व सदस्यांनी मोलाचे सहकार्य केले.