Nashik : काझी गढीवरील 3 घरांच्या भिंती कोसळल्या

जुने नाशिक : संततधारेमुळे (Rain) काझी गढीची माती मोठ्या प्रमाणावर धुतली गेली. काठावर असलेल्या बंद घरांच्या भिंतीचा आधार गेल्याने त्या खाली कोसळल्या (Collapsed). तीनही घरांमध्ये कुणी राहत नसल्याने सुदैवाने दुर्घटना टळली. काझी गढीचा बहुतांशी भाग धोकादायक झाला आहे. (walls of 3 houses on Qazi Gadhi collapsed Nashik latest Marathi News)

दरवर्षी पावसाळ्यात येथील घरांचा भाग कोसळण्याच्या घटना घडत असतात. काही रहिवाशांनी तेथून कायमस्वरूपी स्थलांतर केले आहे. ज्यांची आर्थिक परिस्थिती चांगली नाही, असे रहिवासी मात्र अद्यापही जीव मुठीत घेऊन वास्तव्यास आहे.

गढीची माती पावसाळ्यात धुतली जात असल्याने तो भाग धोकादायक होत असतो. अनेक वर्षांपासून रहिवासी संरक्षण भिंत बांधून देण्याची मागणी करत आहे. मध्यंतरी गढीस संरक्षण भिंत बांधण्याचे टेंडर निघाले आहे. त्यासाठी निधीही आला आहे.

असे वृत्त पसरल्याने रहिवाशांमध्ये आनंदाचे वातावरण होते. त्यांचा हा आनंद क्षणभंगुर राहिला. अद्याप संरक्षण भिंत बांधण्याबाबत प्रत्यक्षात कुठलेही काम सुरू झालेले नाही. गढीच्या एका भागास अनेक वर्षांपूर्वी भिंत बांधण्यात आली आहे. मग दुसऱ्या भागाची भिंत बांधण्यास काय हरकत आहे. दोन्ही भागाच्या भिंतीसाठी वेगळे नियम कसे, असे प्रश्न रहिवासी उपस्थित करत आहे.