आमदार नीलेश लंकेंच्या वकृत्वावर तरूणाई फिदा!

पिंपळगाव बसवंत (जि. नाशिक) : ते आले, त्यांनी पाहिले...अन जिंकून गेले, या ओळीचा प्रत्यय पिंपळगाव बसवंत शहरात दिवाळीच्या पूर्वसंध्येला आला. कोविड (Covid-19) काळात हजारो नागरिकांचे प्राण वाचवून देवदूत ठरलेले पारनेरचे आमदार नीलेश लंके (Nilesh Lanke) हे आज येथे एका कार्यक्रमाप्रसंगी आले होते. त्यांचे जल्लोषात, फटाक्याची आतषबाजी यासह अगदी मंत्र्याचेही स्वागत फिके पडावे अशा पद्धतीने तरूणांनी त्यांचे स्वागत केले. तरूणाईमध्ये आमदार लंके यांची क्रेझ पाहता दोन तासांच्या दौऱ्यात त्यांनी अनेकांची मने जिंकली.

तरूणाईची मने जिकुंन गेले आमदार लंके

कोरोनाच्या (Corona) दुसऱ्या लाटेत कोविड सेंटरमधून हजारोंना जीवनदान देत आमदार लंके यांचे सामाजिक कार्य सर्वदूर पोहचले. आमदार लंके आज अनौपचारिकपणे उद्घाटनाला आले. आमदार दिलीप बनकर यांनी स्व. बनकर पतसंस्था, पिंपळगांव बाजार समिती तर पंचायत समिती सदस्य राजेश पाटील यांनी संपर्क कार्यालयात त्यांचे स्वागत केले. मालक रेडीमेडमध्ये साहिल लोखंडे, साधना मिसळ येथे ॲड. गितेश बनकर यांनी स्वागत केले. आमदार लंके यांची साधी राहणी, ग्रामीण ढंगातील वतृत्व यामुळे उपस्थितांना ते अधिकच भावले. आमदार बनकर यांच्या कार्याचा गौरव त्यांनी केला. गावरान ढंगातील त्यांच्या शाब्दीक फटकेबाजीला उपस्थित तरूणांनी जोरदार टाळ्या, शिट्ट्यांनी दाद दिली.