Autothon 2023 : व्रूम...व्रूम...च्या आवाजाने तरुणाई रोमांचित! ऑटोथॉन 2023 ला दमदार आणि उत्साहात सुरवात

Autothon 2023 : ‘मीडिया एक्झिबिटर्स’ तर्फे आयोजित ऑटोमोबाईल क्षेत्राला खुणावणाऱ्या उत्तर महाराष्ट्रातील सर्वात मोठ्या ऑटो एक्स्पो ‘ऑटोथॉन -२०२३’ ला दमदार आणि उत्साहात सुरवात झाली. (Youth excited Autothon 2023 kicks off with bang nashik news)

सिएटचे ऑपरेशन हेड श्रीनिवास पत्की यांनी फीत कापून तसेच मान्यवरांनी दीपप्रज्वलन करून एक्स्पोचे उद्घघाटन केले. या वेळी पेरेली इंडियाचे रिजनल सेल्स मॅनेजर सुजित गायकवाड, मारुती सुझुकीचे एरिया सेल्स मॅनेजर देवेश कुमार, शिवांग आॉटोमोबाइलचे संचालक बिपिन बटाविया उपस्थित होते.

श्रीनिवास पत्की म्हणाले, की नाशिकमधील नागरिकांना मोटरस्पोर्टसची प्रचंड क्रेझ आहे. त्यासाठी मीडिया एक्झिबिटर्सने नाशिकमध्ये ‘ऑटोथॉन’ हे एक व्यासपीठ उपलब्ध करून दिले आहे.

येथे तुम्हाला पुढील तीन दिवस ऑटो प्रदर्शन, पेंटिंग आणि व्हिंटेज कारचा अनुभव घेता येणार आहे. हे प्रदर्शन पाहण्यासाठी नाशिककरांनी सहभागी व्हावे, असे आवाहन त्यांनी केले.

हेही वाचा : संतुलित आहारातून रोखा फॅटी लिव्हरचा आजार

देवेश कुमार म्हणाले, की मीडिया एक्झिबिटर्ससोबत मारुती सुझुकीने अनेक उपक्रम राबविले आहेत. उत्तर भारतात किंवा मुंबईत एखादे प्रदर्शन आयोजित केले तर मोठा प्रतिसाद मिळत नाही. परंतु नाशिकमधील नागरिक मोठ्या उत्साहात प्रतिसाद देतात हे आम्हाला अनुभवायला मिळाले.

क्लासिक, व्हिंटेज, मॉडर्न क्लासिक कार्स यांच्यासह दुचाकी आणि चारचाकींच्या अनेक ब्रँडच्या मांदियाळीने वाहनप्रेमींच्या डोळ्याची पारणे फिटली.

एक्स्पोमध्ये सहभागी झालेल्या बाइक्सच्या व्रूम... व्रूम आवाजाने उपस्थित तरुणाई रोमांचित झाली. आयोजक संजय न्याहारकर उपस्थित होते. आयोजक साहिल न्याहारकर यांनी प्रास्ताविक तर मीडिया एक्झिबिटर्सचे संचालक नितीन मराठे यांनी आभार मानले.