धडगाव- तालुक्यातील शेलदा गावातील महिलांना हंडाभर पाण्यासाठी वणवण भटकंती करावी लागत आहे. डोंगर-दऱ्यातून पिण्यासाठी हंडाभर पाणी आणावे लागत आहे. डोंगर-दऱ्याची वाट एवढी बिकट आहे की, पाणी आणताना वाटेतच पाण्याचा हंडा अर्धा होतो..‘हर घर नल’चा नारा देत सरकार देशभर जलजीवन मिशन योजना राबवत आहे. या योजनेतून प्रत्येक व्यक्तीला शुद्ध पाणी प्यायला मिळाले पाहिजे, प्रत्येक घरात शुद्ध पाणी पोहचवणे हा मुख्य उद्देश असला तरी शेलदासारख्या आदिवासी दुर्गम भागात जलजीवन मिशन योजना नुसती कागदोपत्रीच पोहचली आहे. पाणी मात्र पोहचलेच नाही. या गावाची एकूण १००९ लोकसंख्या आहे. गावाला स्वतंत्र ग्रामपंचायत आहे. .सरपंच दुंगीबाई रेहमल पावरा यांच्या घरातच जलजीवन मिशनअंतर्गत पाणी पोहचले नसल्याची बाब समोर आली आहे. सरपंच महोदयांना देखील हंडाभर पाण्यासाठी वणवण भटकावे लागते. या ग्रामपंचायतीअंतर्गत सापऱ्यापाडा, बारीपाडा व बर्डीपाडा अशा तीन ठिकाणी लोक राहतात. जलजीवन मिशन योजनेंतर्गत केवळ सापऱ्यापाडा येथे तीन टाक्या बांधण्यात आल्या आहेत. बारीपाडा व बर्डीपाडा येथे ही योजना पोहचलेलीच नाही. .गावात लहान मुलांसाठी अंगणवाडी आहे. या मुलांना पोषण आहार शिजविण्यासाठी पाणी मिळत नाही. अंगणवाडी सेविकांना डोंगर-दऱ्यांतून हंडाभर पाणी आणून आहार शिजवून द्यावा लागतो. पाण्याची सोय झाल्यावर पोषण आहार चांगल्याप्रकारे शिजवून देता येईल. मुलांना पाणी प्यायला मिळेल. पाण्याची सोय झाली तर अनेक समस्या सुटतील, असे अंगणवाडी सेविकांचे म्हणणे आहे..अंगणवाडी इमारतीला परवानगीचा अडसरशेलदा गावात जिल्हा परिषदेच्या दोन शाळा व तीन अंगणवाड्या आहेत. परंतु, शाळा व अंगणवाडी इमारतीच्या बांधकामाला वनविभाग परवानगी देत नाही. ग्रामपंचायत इमारत बांधण्यासही वनविभागाचा अडथळा आहे. पाण्यासाठी हातपंप वनविभाग खोदू देत नाही. जमिन नावावर करावी, पाण्याची सोय करावी, वीज उपलब्ध करून द्यावी, शाळा, अंगणवाडी व ग्रामपंचायत इमारत बांधू द्यावी, अशी मागणी बिरसा फायटर्सचे राष्ट्रीय अध्यक्ष सुशिलकुमार पावरा, धडगाव तालुकाध्यक्ष सुनील तडवी, तुवाज्या पावरा, प्रताप पावरा, राजेंद्र पावरा, दारासिंग पावरा, दिलवरसिंग पावरा, वेल्ला पावरा, डोंग्या पावरा, छोटा पावरा, वोपारी पावरा, गिसली पावरा, मिना पावरा, सेवी पावरा, दमणी पावरा यांनी केली आहे..सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.
