पदवीधर निवडणूक : मतदारांची दुसरी पसंतीही वंजारी यांनाच; भाजपला अतिआत्मविश्वास नडला

नागपूर : नागपूर विभागीय पदवीधर मतदारसंघाच्या निवडणुकीत मतदारांची पहिल्या पसंतीसोबतच दुसरी पसंतीसुद्धा काँग्रेस महाआघाडीचे उमेदवार ॲड. अभिजित वंजारीच असल्याने त्यांचा विजय अधिकच सोपा झाला. वंजारी यांना दुसऱ्या पसंतीची तब्बल पाच हजार ६५३ तर भाजपचे उमेदवार संदीप जोशी यांना फक्त १,२०९ मते पडली.

पदवीधर निवडणुकीत काँग्रेस आणि भाजपमध्ये अतिशय चुरशीचा सामना झाला. पहिल्या पसंतीमध्ये वंजारी यांना ५५ हजार ९४७ तर जोशी यांना ४१ हजार ५४० मते पडली. दोघांनाही ६० हजार ७४७ मतांचा कोटा पूर्ण करता आला नाही. त्यामुळे दुसऱ्या पसंतीची मते मोजावी लागली. एकूणच दुसऱ्या क्रमांकाच्या मोजणी काहीतरी चमत्कार होईल आणि धक्कादायक निकाल लागेल, अशी शक्यता वर्तविली जात होती. अनेकांची धाकधूक वाढली होती.

क्लिक करा - बापरे!; पहाटे साडेपाच वाजता शासकीय बालसुधारगृहात दोन अल्पवयीन मुलांनी केली आत्महत्या

दुसरी पसंती कोणाला याकडे सर्वांचे लक्ष लागले होते. येथेच भाजपची फसगत झाली आणि त्यांना अतिआत्मविश्वास नडला. आपण पहिल्याच क्रमांकाच्या पसंतीने निवडून येऊ, असा विश्वास संदीप जोशी आणि त्यांच्या चमूला होता. त्यामुळे त्यांनी दुसऱ्या क्रमांकाची मते मिळवण्याची फारशी तसदी घेतली नाही.

माजी मुख्यमंत्री तसेच विद्यमान विरोधीपक्ष नेते देवेंद्र फडणवीस यांच्यासारखा चाणाक्ष नेता आणि जिल्हा परिषद ते विधान परिषदेच्या निवडणुकीचा गाढा अनुभव असणारे माजी ऊर्जामंत्री चंद्रशेखर बावनकुळे निवडणूक प्रमुख असताना ही बाब कोणाच्याच लक्षात कशी आली नाही, याबाबत आश्चर्य व्यक्त होत आहे.

मतदार यादी नवीन होती, अनेक भाजप समर्थकांची नावे त्यातून गहाळ होती हे ठाऊक असतानाही पहिले नाही तर किमान दुसऱ्या क्रमांकाच्या मतांसाठी काही उमेदवारांना गाठून मत मिळवण्याचे नियोजनसुद्धा कोणी केले नाही.

अधिक माहितीसाठी - डॉ. शीतल आमटे- करजगी यांचं शेवटचं चॅटिंग कुणाशी? पासवर्ड स्वतःचे डोळे ठेवल्यानं वाढल्या अडचणी

वंजारी पहिल्या फेरीपासूनच आघाडीवर

पहिल्या पसंतीचा कोटा कोणाला गाठता आला नसल्याने नऊ उमेदवारांच्या दुसऱ्या पसंतीच्या मतांची मोजणी करण्यात आली. शेवटच्या १० उमेदवारांना बाद करण्यात आले. त्यांच्या दुसऱ्या क्रमांकाची मते वंजारी आणि जोशी यांना देण्यात आली. त्यातही पहिल्या फेरीपासून वंजारी आघाडीवर होते.

संपादन - नीलेश डाखोरे