लग्नात जास्त वऱ्हाडी बोलवणे भोवले, दोन मंगल कार्यालयावर कारवाई

वानाडोंगरी (जि. नागपूर) : जिल्हाधिकारी रवींद्र ठाकरे व उपविभागीय अधिकारी इंदिरा चौधरी यांच्या आदेशानुसार तहसील खांडरे यांनी परिसरातील दोन मंगल कार्यालयांवर छापा टाकला. यावेळी परवानगीपेक्षा जास्त वऱ्हाडी विनामास्क आढळले. त्यामुळे दंड वसूल केला असून मंगल कार्यालय सील करण्याच्या कारवाईसाठी नोटीस बजावली.

हेही वाचा - अमरावतीच्या काठीला ४५ राज्यांत मागणी; राष्ट्रीय स्वयंसेवक संघासाठी काठी तयार करणे एक...

दोन दिवसांपूर्वीच नागपूर ग्रामीणच्या उपविभागीय अधिकारी यांनी हिंगणा तहसील कार्यालयात आढावा बैठक घेऊन कारवाईसाठी निर्देश दिले होते. त्याप्रमाणे मंगळवारी(ता.१६)हिंगण्याचे तहसीलदार संतोष खांडरे यांच्या आदेशान्वये नायब तहसीलदार महादेव दराडे, वानाडोंगरीचे मंडळ अधिकारी राजेश चुटे, तलाठी सतीश तिवारी व शिपायांना सोबत घेऊन वानाडोंगरी नगरपरिषद अंतर्गत महाजनवाडी परिसरातील बाबडे सभागृह व हिंगणा नगरपंचायत परिसरातील रेणुका सभागृह येथील आयोजित विवाह समारंभात शासनाने कोविड-१९ संदर्भात घालून दिलेल्या नियमांचे उल्लंघन होत असल्याचे दिसून आले. या दोन्ही सभागृहाच्या प्रवेशद्वारावर थर्मल स्क्रिनींगची व्यवस्था नव्हती. परवानगीपेक्षा जास्त वऱ्हाडी होते. बहुतांश वऱ्हाडी विनामास्क आढळले, तसेच सोशल डिस्टसींगचे पालन करण्यात आले नव्हते. दोन्हीही मंगल कार्यालयाकडून ३० हजार रुपये दंड वसूल करण्यात आला असून कार्यालय सील करण्याबाबत नोटीस बजावण्यात आली आहे. तसेच कोविड-१९ चा प्रादुर्भाव होणार नाही, याची प्रत्येक नागरिकांना काळजी घेण्याचे आवाहन तहसीलदार संतोष खांडरे यांनी केले आहे. 

हेही वाचा - Fastag Update : फास्टॅग असूनही भरावा लागला दुप्पट टोल, वाचा काय आहे कारण; टोल नाक्याबाहेर थाटली...

बाबडे व रेणुका सभागृहातील विवाह समारंभात परवानगीपेक्षा जास्त वऱ्हाडी होते. बहुतांश वऱ्हाडी विनामास्क आढळले. त्यामुळे कोविड-१९ च्या नियमांचे उल्लंघन केल्यामुळे दोन्ही सभागृहाकडून दंड वसुलीची कारवाई करण्यात आली. 
-संतोष खांडरे,  तहसीलदार तथा तालुका दंडाधिकारी, हिंगणा