नागपूर विद्यापीठाकडून आजच्या सर्व परीक्षा रद्द; परिपत्रक काढून दिली माहिती

नागपूर : राष्ट्रसंत तुकडोजी महाराज नागपूर विद्यापीठाच्या पहिल्या टप्प्यातील परीक्षांना गुरुवारपासून सुरुवात होणार होती. मात्र, पहिल्याच दिवशी तांत्रिक समस्येमुळे परीक्षांपासून वंचित राहण्याची वेळ विद्यार्थ्यांवर आली. सकाळी सुरू झालेल्या परीक्षांमध्ये विद्यार्थ्यांना बराच मन:स्ताप सहन करावा लागला. सकाळी आठ वाजताचा पेपर दुपारपर्यंत झाला नाही. यानंतर विद्यापीठाने आजचे सर्व पेपर रद्द केल्याचे जाहीर केले. 

विद्यापीठाद्वारे गुरुवारी सकाळपासून चार सत्रात परीक्षेचे आयोजन करण्यात आले होते. त्यातील पहिल्या सत्रात सकाळी ८ ते ११ वाजतादरम्यान बी.कॉम. अंतिम वर्षातील पाचव्या सेमिस्टरमधील फायन्सिअल अकाऊंट विषयाचा पेपर होता. तसेच बीबीए, बीसीए याही अभ्यासक्रमाचे पेपर होते. मात्र, सकाळपासून बहुतांश विद्यार्थ्यांना इंटरनेटअभावी लॉगीन करता आले नाही. ११ वाजेपर्यंत पेपरच सोडविता येत नसल्याने विद्यार्थ्यांमध्ये रोष निर्माण झाला. 

तो म्हणाला, 'माझी भूक भागली'; लैंगिक शोषण करून पत्नीला सोडलं वाऱ्यावर; दर्यापुरातील घटना

या विद्यार्थ्यांनी थेट महाविद्यालय गाठून तक्रार नोंदविली. यानंतर सकाळी ११.३० वाजता बीएस.स्सी.च्या पाचव्या सेमिस्टरचा भूगर्भशास्त्र, सांख्यिकी यासह विज्ञान शाखेच्या विविध विषयांचे पेपर घेण्यात आले. तसेच अभियांत्रिकीच्या विद्यार्थ्यांचाही समावेश करण्यात आला होता. मात्र, त्यातही विद्यार्थ्यांना त्रास सहन करावा लागला. संकेतस्थळावर क्लिक केले असता, अनेक विद्यार्थ्यांना इंटरनेट स्पीड नसल्याचे सांगण्यात येत होते. त्यामुळे विद्यार्थी हैराण झाले.

समस्या सुटत नसल्याचे पाहून राष्ट्रसंत तुकडोजी महाराज विद्यापीठाद्वारे परीक्षा रद्द केल्याचे पत्रक काढण्यात आले. गुरुवारच्या सर्व पाळीतील सर्व विषयाच्या परीक्षा तांत्रिक कारणामुळे रद्द करण्यात आल्या आहे. या परीक्षांची पुनर्निधारित तारीख नंतर घोषित करण्यात येईल, असेही यात म्हटले आहे.