तिघांनी एकाच 'चिलम'द्वारे केली नशा, एकाचा मृत्यू तर दोघे...

नागपूर : दक्षिण नागपुरात तीन दिवसांपूर्वी 22 वर्षीय कोरोनाबाधिताचा मृत्यू झाला. या मृताकडून इतर दोघांना बाधा झाली. मृतासह बाधितांनी एकाच चिलममधून नशा केली होती. यामुळे कोरोनाचा संसर्ग झाला असल्याचा प्राथमिक अंदाज डॉक्‍टरांनी केलेल्या प्राथमिक तपासातून पुढे आले आहे. यामुळे टाळेबंदीत अनधिकृतरीत्या सामूहिक व्यसनातून कोरोनाचा संसर्ग सहज होऊ शकतो, असे स्पष्ट करताना काही तज्ज्ञांनी शोध घेतल्यानंतर ही माहिती पुढे आल्याचे दिसून आले. 

उपराजधानीतील युवकाची प्रकृती खालवल्यावर त्याला तातडीने सहा मे रोजी मेडिकलमध्ये हलवले. परंतु, आकस्मिक विभागातच त्याचा मृत्यू झाला. यानंतर त्याचे शव शवागारात ठेवले. मात्र, नातेवाइकांच्या सांगण्यावरून डॉक्‍टरांनी त्याच्या घशातील द्रव्याचे नमुने घेतले. विशेष असे की, त्याच्या घशातील नमुने हे शवागारात जाऊन घेण्यात आले. ते नमुने तपासले असता त्याला कोरोनाची बाधा झाल्याचे 7 मे रोजी प्रयोगशाळेतील अहवालातून स्पष्ट झाले.

जाणून घ्या - शहर म्हणजे 'कोरोना'ची उपराजधानी; माफ करा... आम्ही तुम्हाला गावात येऊ देणार नाही

या तरुणाच्या संपर्कातील आलेला जयभीमनगर आणि रामेश्वरीचा प्रत्येकी 25 आणि 28 वर्षीय युवक मेडिकलमध्ये दाखल झाले. त्यांनाही कोरोनाची बाधा झाल्याचे निदान झाले. या विषाणूच्या संक्रमणाची साखळी जोडण्यासंदर्भातील संशोधन सामाजिक औषधशास्त्र विभाग (पीएसएम) तज्ज्ञांकडून सुरू झाले. मृत तसेच उपचारासाठी दाखल असलेल्या दोघे अशा तिघांनाही गांजा ओढण्याचे व्यसन असल्याचे प्राथमिकदृष्ट्या उपचारादरम्यान पुढे आले. 

तिघेही एकाच चिलमीतून व्यसन करीत असल्याने त्यांच्या फुप्फुसात या विषाणूचे गंभीर संक्रमण झाले आहे. यातूनच पार्वतीनगरच्या युवकाचा मृत्यू झाल्याचा प्राथमिक अंदाज व्यक्त करण्यात आला. ही माहिती महापालिकेतील काही अधिकाऱ्यांच्या कानावरही घालण्यात आली. त्याबाबत आणखी माहिती गोळा करण्याचे प्रयत्न सुरू झाले आहेत.

क्लिक करा - आग्रहाखातर तो सासरी राहायला गेला; मात्र, पत्नीचे दुसऱ्याशी सूत जुळल्याने घडला थरार...

अशा व्यसनामुळे जीविताला धोका

या घटनेमुळे टाळेबंदीतही अनधिकृतपणे व्यसनाधीनांची प्रकरणे पुढे येत आहेत. यामुळे हॉटस्पॉट असलेल्या भागातील व्यसनामुळे साखळी तयार झाली की, काय अशी भीती व्यक्त होत आहे. अशा प्रकारचे व्यसन केल्याने जीविताला धोका संभावतो, असे सूत्रांनी सांगितले. या विषयावर मेडिकलसह महापालिकेच्या आरोग्य विभागातील अधिकाऱ्यांशी संपर्क साधला; परंतु अधिकारी बोलण्यास तयार नाही.