नागपूर हादरले! उच्चशिक्षित दाम्पत्याची दोन मुलांसह आत्महत्या

नागपूर : उच्चशिक्षित दाम्पत्याने आपल्या दोन मुलांसह आत्महत्या केली. अंगावर शहारा आणणारी ही घटना आज मंगळवारी कोराडीतील ओमनगरात घडली. प्रा. धीरज राणे (४२), डॉ. सुषमा धीरज राणे (३८), धृव (११) आणि लावण्या (६) अशी मृतांची नावे आहेत.

धंतोली येथील हॉस्पिटलमध्ये कार्यरत असलेल्या कार्डियोलॉजिस्ट डॉक्टर सुषमा आणि रायसोनी कॉलेज आॅफ इंजीनियरिंग येथे प्रोफेसर असलेले त्यांचे पती धीरज राणे यांनी मुलगा धृव वय ११ वर्ष आणि मुलगी लावण्या वय वर्षे ६, या दोन चिमुकल्यांसकट आत्महत्या केल्याने परिसरात एकच खळबळ माजली आहे. आत्महत्येचे कारण अद्याप अस्पष्ट आहे.

सविस्तर वाचा - ते दुचाकीने दोन मुलींसह सासुरवाडीला आले अन् भेट ठरली अखेरची, वाचा... कंटेनरच्या धडकेत पित्याचा मृत्यू

त्यांच्यासोबत डॉक्टरची वयोवृद्ध आई राहात होती. मध्यरात्री १२ वाजताच्या सुमारास दाम्पत्यांशी वयोवृद्ध आईचे बोलणे झाले होते, असे निकटवर्तीयांनी सांगितले.सकाळी त्यांच्या खोलीचे दार ठोठावून काहीच प्रतिसाद न मिळाल्याने आरडाओरड केल्यानंतर घटना लक्षात आली. कोराडी पोलिसांनी घराचा ताबा घेतला असून, पोलिस निरीक्षक वझिर शेख यांच्या नेतृत्वाखाली पुढील तपास सुरू आहे.

संपादन - स्वाती हुद्दार