देवेंद्र फडणवीस म्हणाले, सरकारच्या कारभाराला वैतागुण सुबोधकुमार जयस्वालांनी मागितली प्रतिनियुक्ती

नागपूर : सरकारच्या स्थापनेपासून पहिल्यांदाच असे घडले असावे की, सरकारच्या कारभाराला कंटाळून पोलिस महासंचालक सुबोधकुमार जयस्वाल प्रतिनियुक्तीवर जात आहे. महाराष्ट्रासाठी ही गोष्ट भूषणावह नक्कीच नाही. पोलिस विभागाच्या मनोबलावर या घटनेचा निश्‍चित परिणाम होणार आहे, असे राज्याचे माजी मुख्यमंत्री आणि विरोधी पक्ष नेते देवेंद्र फडणवीस म्हणाले.

ज्या प्रकारचा सरकारचा कारभार सुरू आहे. त्याला सुबोधकुमार जयस्वाल वैतागले होते. डीजींना कुठेही विश्‍वासात न घेता कामे सुरू आहे. राज्य सरकारने समजून घेतले पाहिजे की, पोलिसिंग हा स्वतंत्र विभाग आहे. गृह मंत्रालयाच्या अखत्यारीत हा विभाग येत असला तरी आपण त्या विभागाला स्वायत्तता दिली आहे, असे देवेंद्र फडणवीस म्हणाले.

अधिक वाचा - अति घाई संकटात नेई! शासनाची घाई लोकप्रतिनिधींच्या मुळावर; थेट सरपंच निवडीचा निर्णय रद्द

मुख्यमंत्री आणि गृहमंत्र्यांचे या विभागाच्या बाबतीतलं काम हे पर्यवेक्षकीय पद्धतीचे असते. परंतु, सद्यःस्थितीत छोट्यातल्या छोट्या बदल्यांपासून सर्वंच कामांमध्ये सरकारचा हस्तक्षेप सुरू आहे. त्यामुळेच डीजी सुबोधकुमार जयस्वाल यांनी असा निर्णय घेतला असावा.

शेवटी सरकारच्या इतर विभागाप्रमाणे हासुद्धा एक विभाग आहे. बदल होतच असतात, माणसं येत असतात आणि जात असतात. चांगली माणसं अशा प्रकारे घालवणे, हे योग्य नसल्याची टीका देवेंद्र फडणवीस यांनी केली.

नागपूर जिल्ह्यातील ताज्या बातम्यांसाठी क्लिक करा

राज्य सरकारने धडा घेतला पाहिजे

महाराष्ट्राला सुबोधकुमार जयस्वाल, हे कार्यक्षम पोलिस महासंचालक लाभले होते. परंतु, पोलिसांच्या कामात सरकारचा हस्तक्षेप येवढ्या मोठ्या प्रमाणात वाढला की, त्याला कंटाळून त्यांनी प्रतिनियुक्ती मागितली. केंद्र सरकारने त्यांची मागणी मान्य केली आणि त्यांना सीआयएसएफला प्रतिनियुक्ती दिली. यातून राज्य सरकारने धडा घेतला पाहिजे, असे राज्याचे माजी मुख्यमंत्री आणि विरोधी पक्ष नेते देवेंद्र फडणवीस म्हणाले. 

संपादन - नीलेश डाखोरे