नागपुरात बारा तासांत 100 मिलिमीटर पाऊस। उडाली दाणादाण

नागपूर : गेल्या दीड महिन्यापासून नागपूरकर ज्या धुवॉंधार पावसाची प्रतीक्षा करीत होते, तो अखेर काल रात्री बरसला. रात्रभर पडलेल्या मुसळधार पावसाने शहराची अक्षरशः दाणादाण उडविली. अवघ्या बारा तासांत तब्बल 100 मिलिमीटर पावसाची नोंद हवामान विभागातर्फे करण्यात आली. विदर्भावरील पावसाचे संकट अद्याप टाळले नाही. आज-उद्याही विदर्भात मुसळधार पावसाची दाट शक्‍यता आहे.

हवामान विभागाने मंगळवारपासून मुसळधार पावसाचा इशारा दिला होता. हवामान विभागाचा अंदाज तंतोतंत खरा ठरला. दुपारच्या सुमारास जोरदार सरी कोसळल्यानंतर वरुणराजाने रात्री अचानक गिअर बदलविला. रात्री दहानंतर शहरात सगळीकडेच विजांच्या कडकडाटांसह धोधो पाऊस बरसला. पहाटेपर्यंत पाऊस सुरूच होता. मंगळवारी रात्री साडेआठ ते बुधवारी सकाळी साडेआठपर्यंत तब्बल 100.8 मिलिमीटर पावसाची नोंद करण्यात आली.

सविस्तर वाचा - आई होण्याचा मंतरलेला नऊ महिन्यांचा काळ

उल्लेखनीय म्हणजे, यंदाच्या पावसाळ्यात 12 तासांत एवढा पाऊस पहिल्यांदाच बरसला आहे. 15 दिवसांचा पाऊस एकाच रात्री कोसळला. पावसामुळे अनेक भागांत कुठे गुडघाभर तर कुठे कंबरेपर्यंत पाणी साचले होते. काही ठिकाणी विद्युत पुरवठाही खंडित झाला होता. त्यामुळे नागरिकांना अंधारात रात्र काढावी लागली. शिवाय अग्निशमन विभागाच्या कर्मचाऱ्यांचीही चांगलीच दमछाक झाली. हवामान विभागाने आज-उद्याही विदर्भात मुसळधार पावसाची शक्‍यता वर्तविली आहे. काही जिल्ह्यांत अतिवृष्टीचीही शक्‍यता आहे.  

संपादन - स्वाती हुद्दार