क्षुल्लक वाद जीवावर बेतला, पत्नी व मुलीची आठवण आली अन् त्यानं उचलले टोकाचे पाऊल

नागपूर : क्षुल्लक वादातून पत्नी मुलीला घेऊन माहेरी निघून गेली. तिला घरी आणण्यासाठी वारंवार प्रयत्न केले. परंतु, पत्नी घरी येत नसल्यामुळे पतीच्या मनावर विपरित परिणाम झाला. पत्नी व मुलीच्या विरहात त्याने गळफास घेऊन आत्महत्या केली. ही दुर्दैवी घटना अंबाझरीत उघडकीस आली. 

हेही वाचा - वाघाच्या हल्ल्यात काकासह पुतण्याही ठार, कुटुंबीयांनी...

स्नेहल हुसन ढोणे (३७) असे मृत व्यक्तीचे नाव आहे. स्नेहल हे एका प्रिंटींग प्रेसमध्ये ऑपरेटर होते. ते पत्नी व ८ वर्षाच्या मुलीसह टेकडी वाडी परिसरात राहत होते. एका वर्षांपूर्वी क्षुल्लक कारणावरून पती-पत्नीत वाद झाला. त्यामुळे रागाच्या भरात पत्नी मुलीला घेऊन माहेरी निघून गेली. काही दिवसानंतर राग शांत झाल्याचे बघून स्नेहल हे पत्नी व मुलीला आणायला गेले होते. मात्र, तिने सोबत येण्यास नकार दिला. त्यामुळे तो तणावात होता. घरात एकटाच राहत असल्यामुळे त्याला पत्नी व मुलीचा विरह सहन होत नव्हता. त्यामुळे त्याने दारू पिणे सुरू केले. गेल्या वर्षभरापासून तो एकाकी पडला होता. शेवटी त्याने मंगळवारी सायंकाळी सात वाजताच्या सुमारास घरात गळफास घेऊन आत्महत्या केली. या प्रकरणी अंबाझरी पोलिसांनी आकस्मिक मृत्यूची नोंद केली.