या शहरात कोरोनाचे त्रिशतक पूर्ण

नागपूर : उपराजधानी कोरोना रुग्णांची संख्या दिवसेंदिवस वाढत असून, मंगळवारी दुपारी आणखी दोन संशयित रुग्णांचे अहवाल पॉझिटिव्ह आल्याने नागपुरातील कोरोनाग्रस्तांचा आडका तिनशेवर पोहोचला. मंगळवारी सतरंजीपुरा येथील 42 वर्षीय तर मोमिनपुरा येथील 52 वर्षीय पुरुषाचे अहवाल पॉझिटिव्ह आल्याने नागपुरात रुग्णसंख्या तिनशेवर पोहोचली.

मेडिकलच्या कोविड हॉस्पिटलमध्ये उपचारासाठी भरती असलेला पांढराबोडी येथील 29 वर्षीय कोरोनाबाधित युवकाचा सोमवारी मृत्यू झाला. कोरोनाच्या विषाणूमुळे नागपुरात झालेला हा चौथा मृत्यू आहे. उपराजधानीत कोरोनाच्या बाधेमुळे सतरंजीपुरा येथील पहिला मृत्यू झाला होता. यानंतर तब्बल 25 दिवसांनंतर मोमिनपुरा येथील वृद्ध दगावला होता. तर यानंतर रामेश्‍वरी येथील फूटबॉलचा खेळाडू असलेला 22 वर्षीय युवक कोरोनामुळे दगावला होता.

 तुकाराम मुंढेंनी करून दाखवले राज्यातील सर्वात मोठे कोव्हिड हॉस्पिटल

सोमवारी (ता.11) शहरात चौथ्या मृत्यूची नोंद झाली. शहरात झालेल्या दुसऱ्या, तिसऱ्या आणि चौथ्या मृत्यूंमध्ये पाच-पाच दिवसांचे अंतर आहे हे विशेष. शहरातील चौथा मृत व्यक्‍ती पांढराबोडीतील रहिवासी आहे. 6 मे रोजी मेडिकलमध्ये झालेल्या तपासणीतून हा युवक कोरोनाबाधित असल्याचे स्पष्ट झाले होते. तत्काळ त्याच्यावर मेडिकलच्या कोविड वॉर्डात उपचार सुरू झाले.

मात्र, पांढराबोडीतील या युवकाला यकृताचा आजार होता. याशिवाय रक्तक्षय असून क्षयाचाही रुग्ण असल्याने त्याची रोगप्रतिकारशक्ती अतिशय खालावली होती. श्‍वास घेताना त्याला धाप लागत असे. 6 मे रोजी कोविड हॉस्पिटलमध्ये दाखल झाल्यानंतर त्याच्यावर उपचार सुरू झाले. संपर्कातून या व्यक्तीला कोरोनाची बाधा झाली होती. शहरातील चारही मृत्यू सामुदाय प्रादुर्भावाचे बळी ठरले असे म्हणता येईल.

मृत कोरोनाबाधिताच्या पार्थिवावर मोजक्‍या नातेवाइकांच्या उपस्थितीत महापालिकेच्या कर्मचाऱ्यांनी रात्री अंबाझरी घाटावर अंत्यसंस्कार केले. धरमपेठ झोनचे झोनल आरोग्य अधिकारी दीनदयाल टेंभेकर यांच्या मार्गदर्शनात कोरोनाबाधित मृतदेहाच्या विल्हेवाटीसंदर्भातील मार्गदर्शक तत्त्वानुसार अंत्यसंस्कार करण्यात आले.

अमरावतीत कोरोनाग्रस्तांची वाटचाल शतकाकडे

कोरोनामुक्त झालेल्यांची शतकी वाटचाल

शहरात बाधितांची संख्या तिनशे झाली असली तरी कोरोनावर मात करणाऱ्यांचे शतक पूर्ण होत आहे. सोमवारी चार जणांनी कोरोनावर मात केली असून कोरोनामुक्तांचा आकडा 96 वर पोहोचला. सोमवारी मेडिकलमधील एक आणि मेयोतील तीन अशा चौघांना कोरोनामुक्त झाल्याचे घोषित करण्यात आले. त्यांना रुग्णालयातून सुटी देण्यात आली.
...