कुठे गेली प्लास्टिक बंदी? उडाला फज्जा; महिनाभरात जप्त झालेल्या प्लास्टिकचा आकडा बघून व्हाल थक्क 

नागपूर ः राज्य सरकारने प्लॅस्टिक बंदी केली असली तर शहरात मोठ्या प्रमाणात विक्री व वापर होत आहे. महापालिकेने जानेवारीमध्ये सव्वापाच टन प्लॅस्टिक जप्त केल्याने शहरात प्लॅस्टिक बंदीचा फज्जा उडाल्याचे स्पष्ट झाले. महाल, इतवारीसारख्या बाजारपेठ असलेल्या गांधीबाग झोनमध्ये सर्वाधिक पाच टन १३१ किलो प्लॅस्टिक जप्त करण्यात आले. 

प्लॅस्टिकवर बंदी असतानाही विक्री व वापर होत असल्याने मनपा आयुक्त राधाकृष्णन बी. यांनी कारवाईचे आदेश दिले आहे. महानगरपालिकेच्या उपद्रव शोध पथकाद्वारे दहाही झोनमध्ये ठिकठिकाणी धाडी टाकण्याचे सत्र नियमित सुरू आहे. उपद्रव शोध पथकाने जानेवारीत एकूण ५३१ दुकानांवर धाड घातली. यातील ४६ दुकानांतून ५ हजार २८७ किलो प्लॅस्टिक जप्त केले. 

हेही वाचा - भयंकर प्रकार! मेडिकलच्या ट्रॉमात रात्री कुत्र्यांचा मुक्त वावर; २००७ मध्ये कुरतडले...

विक्रेत्यांकडून २ लाख ३० हजाराचा दंड वसूल करण्यात आला. उपद्रव शोध पथक प्रमुख विरसेन तांबे यांच्या नेतृत्वात दहाही झोनमधील पथकाद्वारे करवाई करण्यात आली. सर्वाधिक जप्तीची कारवाई महाल, इतवारीसारख्या बाजारपेठ असलेल्या गांधीबाग झोनमध्ये करण्यात आली. या झोनमध्ये ८० दुकानांवर धाड टाकली. यातील १४ दुकानांतून ५१३१ किलो प्लॅस्टिक जप्त करून त्यांच्याकडून ७० हजाराचा दंड वसूल करण्यात आला आहे. विशेष म्हणजे इतर नऊ झोनमधून केवळ १५६ किलो प्लॅस्टिक जप्त करण्यात आले. मात्र, या नऊ झोनमधून सर्वाधिक १ लाख ६० हजारांचा दंड वसूल करण्यात आला. 

हेही वाचा - मटणाच्या हिस्याप्रमाणे त्याच्या वाट्याला आली २२ लाख २४ हजारांची रक्कम; मात्र, नशिबाने दिली नाही साथ

झोननिहाय कारवाई 

झोन आणि जप्त प्लास्टिक 

लक्ष्मीनगर -- ८ किलो 
धरमपेठ -- ७४ किलो 
हनुमाननगर -- ८ किलो 
धंतोली -- २४ किलो 
नेहरूनगर -- ५ किलो 
गांधीबाग -- ५१३१ किलो 
सतरंजीपूरा -- १७ किलो 
लकडगंज -- ११ किलो 
आशीनगर -- ९ किलो 
एकूण -- ५२८७ किलो 

संपादन - अथर्व महांकाळ