नागपूर : शासकीय नोकरीसाठी स्पर्धा परीक्षांकडे तरुणाईचा कल वाढला आहे. यासाठी अनेक तरुण हे दिल्ली, मुंबई, पुणे आदी ठिकाणी शिकवणी लावून अभ्यास करीत आहेत. मात्र, कोरोनाच्या वाढत्या प्रादुर्भावामुळे अनेक विद्यार्थी हे आपली पुस्तके न घेताच गावी परतले आहेत. देश 14 एप्रिलपर्यंत लॉकडाऊन करण्यात आल्याने विद्यार्थ्यांचे नुकसान होत आहे. मात्र, विद्यार्थ्यांनी या काळात सोशल मीडियाचा प्रभावी वापर करून एमपीएससी, यूपीएससीचा ऑनलाइन अभ्यास करावा असे आवाहन प्राध्यापकांनी केले आहे.
आजच्या आधुनिक आणि धकाधकीच्या काळात प्रत्येक तरुण हा शासकीय नोकरी मिळवण्यासाठी धडपड करीत आहे. यासाठी दिवसरात्र अभ्यास करीत असतो. यात एरवी अभ्यासासाठी ग्रंथालयांमध्ये पुस्तकांच्या गराड्यात बसलेले तरुण पाहणे नित्याचे असले तरी सध्या कोरोना व्हायरसच्या धास्तीने हे तरुण आपल्या गावी घरातच बसून आहेत. तब्बल 21 दिवस घरातच रहावे लागणार असल्याने तरुणांना आपला अभ्यास बुडण्याची मोठी चिंता लागून आहे.
परीक्षेची तारीख पुढे ढकलली असली तरी पुस्तके सोबत नसल्याने त्यांचा वेळ वाया जात आहे. मात्र, स्पर्धा परीक्षांचा अभ्यास करणाऱ्या तरुणांना पुस्तके नाही म्हणून घरी रिकामे न बसता सोशल मीडियाचा प्रभावी वापर करीत अभ्यास करता येणार आहे. यासाठी इंटरनेटवर विविध वेबसाईट आहेत. ज्या अपडेट देखील करण्यात आल्या आहे. या वेबसाइटचे लाखो युजर्स असले तरी या काळात नेहमीच्या तुलनेत अधिक विद्यार्थ्यांनी साईटचा वापर करावा. परीक्षेची तारीख पुढे ढकलली गेली असली तरी लवकरच परीक्षा होणार असल्याने या विद्यार्थ्यानी तंत्रज्ञानाचा वापर करीत अभ्यास करावा.
स्पर्धा परीक्षांसाठी असलेल्या या वेबसाईटवर माहितीसह काही पुस्तकांचे पीडीएफ देखील उपलब्ध आहेत. सोबतच तज्ज्ञांच्या मार्गदर्शनाचे व्हिडिओ देखील उपलब्ध आहे. याद्वारे विद्यार्थ्यांना एकाच ठिकाणी सर्व प्रकारची माहिती उपलब्ध होते. तसेच अभ्यास करण्यास अडचणी देखील येत नाही.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.