नागपूरच्या कारागृहात चाललं काय! डॉन अरुण गवळीनंतर प्रा. साईबाबासह आणखी पाच कैद्यांना कोरोना

नागपूर : मध्यवर्ती कारागृहात जन्मठेपेची शिक्षा भोगत असलेला माओवादी प्रा. जी. एन. साईबाबासह आणखी पाच जण कोरोना पॉझिटिव्ह आढळले. यामुळे कारागृहातील बंदीवान व प्रशासनामध्ये खळबळ उडाली आहे. यापूर्वी डॉन अरुण गवळीसह पाच जणांना कोरोनाची लागण झाली आहे. पॉझिटिव्ह कैद्यांची संख्या आता दहा झाली आहे. एक रक्षकही पॉझिटिव्ह असल्याची माहिती आहे.

प्रा. साईबाबासह कारागृहातील बंदीवानांची तपासणी करण्यात आली. शनिवारी प्रा. साईबाबासह पाच जण पॉझिटिव्ह असल्याचा अहवाल कारागृह प्रशासनाला मिळाला. त्यानंतर कारागृह प्रशासनाने साईबाबासह पाच जणांना मेडिकलमध्ये दाखल केले. तेथे त्यांच्यावर उपचार सुरू आहेत. या वृत्ताला कारागहाचे अधीक्षक अनुपकुमार कुमरे यांनी दुजोरा दिला आहे.

अधिक वाचा - ‘मुलांनो, आम्हाला माफ करा; आमचे मृतदेह मेडिकल कॉलेजला दान करा’ अशी चिठ्ठी लिहून दाम्पत्याची आत्महत्या

२८ ऑगस्ट २०१३ ला पोलिसांनी अहेरीच्या बसस्थानकावरून हेम मिश्रा, महेश तिरकी आणि पांडू नरोटे या तिघांना अटक केली. त्यावेळी हेम मिश्राकडून १६ ‘जीबी’चा पेनड्राईव्ह जप्त करण्यात आला.

यात गडचिरोलीतील जहाल माओवादी नर्मदाक्का, प्रकाश आणि इतरांसाठी अनेक संदेश होते. त्यानंतर काही दिवसांनी भूमिगत माओवादी रामदार याला भेटण्यासाठी देवरी-चिचगड मार्गाने गडचिरोली दाखल होणाच्या प्रयत्नातील प्रशांत राही व विजय तिरकीला गडचिरोली पोलिसांनी अटक केली.

नागपूर जिल्ह्यातील ताज्या बातम्यांसाठी क्लिक करा

त्यांच्याकडून मिळालेल्या दस्तावेजांची तपासणी पोलिसांनी केली. दिल्ली विद्याापीठाशी संलग्नित असलेल्या रामलाल आनंद महाविद्याालयात इंग्रजीचा प्राध्यापक असलेला प्रा. जी. एन. साईबाबाचे नाव पोलिसांसमोर आले. पोलिसांनी साईबाबालाही अटक केली. याप्रकरणात गडचिरोली सत्र न्यायालयात खटला चालला. न्यायालयाने साईबाबासह अन्य आरोपींना शिक्षा ठोठावली. तेव्हापासून साईबाबा नागपूर कारागृहात आहे.