साहिलचे नखरे सुरू,म्हणतो, डॉ. गंटावार कोण?

नागपूरः वादग्रस्त साहिल सैयदला गुन्हे शाखेने बेड्या ठोकल्यानंतर पीसीआरमध्ये त्याला खाक्‍या दाखवणे सुरू केले आहे. डॉ. गंटावार आणि साहिलने ऍलेक्‍सिसमध्ये बनावट छापा घालून खांडणी वसुलण्याचा कट रचला होता. या प्रकरणी पोलिस त्याला प्रश्‍न विचारत आहेत. मात्र, "डॉ. गंटावार कोण?' असा प्रतिसवाल तो पोलिसांना विचारून पोलिसांची दिशाभूल करीत आहेत.
 
पोलिसांनी दिलेल्या माहितीनुसार, कुख्यात साहिल सय्यद याने महापालिकेचे आरोग्य अधिकारी डॉ. प्रवीण गंटावार व अन्य एका अधिकाऱ्याला हाताशी धरून मानकापूरमधील ऍलेक्‍सिस हॉस्पिटलविरुद्ध कारवाई करवून घेतल्याची माहिती गुन्हेशाखा पोलिसांना प्राप्त झाली आहे. या दिशेने गुन्हेशाखा पोलिसांनी तपासाची चक्रे फिरविली असून, दुसरा अधिकारी कोण याचा तपास पोलिस करीत आहेत. मंगळवारी गुन्हेशाखा पोलिसांनी साहिल सय्यद याची कसून चौकशी केली मात्र तो सतत पोलिसांना दिशाभूल करणारी माहिती देत आहे. गंटावारांशी असलेल्या संबंधाबाबतही पोलिसांनी त्याच्याकडे विचारपूस केली. मात्र गंटावार कोण, असा उलट प्रश्न तो पोलिसांना करीत आहे. त्यामुळे पोलिसही चक्रावून गेले आहेत. त्याला पाहूणचार दिल्यानंतर तो पोपटासारखा बोलेल, असा विश्‍वास पोलिसांनी व्यक्‍त केला आहे.

वाचा- भयानक! दुचाकी उसळून घुसली मिनिडोअरमध्ये, दोघांचा जागीच मृत्यू

ऍलेक्‍सिस हॉस्पिटलविरुद्ध कारवाई करण्यासाठी साहिल या महापालिकेच्या या अधिकाऱ्यासोबत बोलणी केली होती,असा दावा सूत्रांनी केली आहे. साहिल याच्याविरुद्ध फसवणूक व खंडणीचे चार गुन्हे दाखल आहेत. पाचपावलीतील फसवणूक प्रकरणात पोलिसांनी साहिल याला अटक केली. त्याच्याकडे चार पॅनकार्डही पोलिसांना आढळले. या पॅनकार्डबाबत साहिल काहीही माहिती नसल्याचे पोलिसांना सांगत आहे. साहिल हा 22 जुलैपर्यंत पोलिस कोठडीत आहे. फरार असताना तो इंदूर येथे लपून बसला होता. तेथे त्याच्या डोक्‍यावर कुणाचा हात होता? याचा तपास पोलिस करीत आहेत. पोलिसांपासून वाचण्यासाठी तो नागपुरातील कोणकोणत्या नेत्यांच्या संपर्कात होता, याचा तपासही गुन्हेशाखा पोलिस करीत आहेत. दरम्यान एका नायब तहसीलदाराला लाच प्रकरणात अडकविल्याचे प्रकरणाचा तपासही पोलिस करणार असल्याची माहिती आहे. आणखी दोन दिवस साहिल पीसीआरमध्ये असल्यामुळे साहिलच्या पापात भागीदार असलेल्यांमध्ये खळबळ उडाली आहे.

संपादन- अनिल यादव