लॉकडाउन म्हणजे वेडेपणाचा निर्णय, संदीप जोशींची पालकमंत्र्यांवर टीका

नागपूर : लॉकडाउन घोषित केल्यामुळे माजी महापौर संदीप जोशी यांनी पालकमंत्री डॉ. नितीन राऊत यांच्यावर टीका केली. हा वेडेपणाचा निर्णय असल्याची जोरदार टीका केली. संदीप जोशी यांच्या टीकेमुळे कोरोनाच्या गंभीर स्थितीत पालकमंत्रीविरुद्ध भाजप असा संघर्ष निर्माण होण्याची शक्यता व्यक्त केली जात आहे. राऊत यांनी लॉकडाउनची घोषणा केल्यानंतर माजी महापौर संदीप जोशी यांनी व्हीडीओ जारी करून पालकमंत्र्यांच्या निर्णयाचा समाचार घेतला. गोरगरीब जनता, मध्यमवर्गीय, निम्न मध्यमवर्गीय आणि नियम पाळणाऱ्यांसाठी हा पालकमंत्र्यांनी घेतलेला निर्णय अत्यंत क्लेशदायक आहे. आपल्या अपयशावर पांघरून घालण्यासाठी सामान्यांवर लॉकडाउन लादणे हे चुकीचे पाऊल आहे, अशी टीका जोशी यांनी केली आहे. 

हेही वाचा - "महाविकास आघाडीचे सरकार पडणार पण त्यांना आताच सावध का करू?"

महापौरांचा सावध पवित्रा - 
माजी महापौर संदीप जोशी यांनी थेट टीका केली असली तरी पक्षातील त्यांचे सहकारी महापौर दयाशंकर तिवारी यांनी याबाबत सावध पवित्रा घेतला आहे. महापौर तिवारी यांनी त्यांच्या फेसबुकवर एक पोस्ट टाकली आहे. त्यात त्यांनी 'सावधान, १५ ते २१ मार्चदरम्यान नागपूर शहरात कडक लॉकडाउन' एवढेच नमुद केले आहे. विशेष म्हणजे त्यांच्या पोस्टवर अनेकांनी 'कमेंट'मध्ये प्रतिक्रिया व्यक्त करताना लॉकडाउनला विरोध केला आहे.