लागली लॉटरी आणि वाघ ठाकूरसोबत निघाला अबुधाबीला, पण तिथे जाऊन नेमके काय करणार? वाचा...

नागपूर : आयपीएलमध्ये विदर्भाच्या क्रिकेटपटूंना जणू लॉटरीच लागली आहे. एक नव्हे, दोन नव्हे तब्बल पाच मध्यमगती गोलंदाजांची 'नेट बॉलर' म्हणून निवड करण्यात आली आहे. सौरभ दुबे, आदित्य ठाकरे व नचिकेत भुतेपाठोपाठ आता अनुभवी श्रीकांत वाघ आणि यश ठाकूरही अबुधाबीला जाणार आहेत. १३ वी आयपीएल स्पर्धा येत्या १९ सप्टेंबरपासून संयुक्त अरब अमिरातच्या अबुधाबी येथे खेळली जाणार आहे.

घरगुती स्पर्धेतील चमकदार कामगिरीमुळे या स्पर्धेसाठी नेट बॉलर' म्हणून विदर्भाच्या खेळाडूंना अधिक मागणी आहे. श्रीकांतची निवड स्टिव्ह स्मिथच्या नेतृत्वाखालील राजस्थान रॉयल्स संघात, तर ठाकूरची के. एल. राहुलच्या किंग्ज इलेव्हन पंजाब संघात निवड करण्यात आली आहे. काही दिवसांपूर्वी विदर्भाच्याच सौरभची रोहित शर्माच्या मुंबई इंडियन्स संघात, आदित्यची विराट कोहलीच्या रॉयल चॅलेंजर्स बंगळुरू संघात आणि नचिकेतची किंग्ज इलेव्हन पंजाब संघात 'नेट बॉलर' म्हणून निवड करण्यात आली होती. याशिवाय आंतरराष्ट्रीय क्रिकेटपटू उमेश यादव आणि अकोल्याचा दर्शन नळकांडेही आयपीएलमध्ये दिसणार आहेत. उमेश बंगळुरू संघात, तर दर्शन पंजाब संघाचे प्रतिनिधित्व करणार आहेत.

वाचा - टीप मिळाली होती दारू आणि जुगाराची अन् कारवाईसाठी आलेल्या पोलिसांना दिसले भलतेच! वाचा सविस्तर

राजस्थान रॉयल्स आणि सध्या अस्तित्वात नसलेल्या पुणे वॉरियर्सचा सदस्य राहिलेल्या ३१ वर्षीय वाघने गतवर्षी आयपीएल लिलावाच्या वेळी राजस्थान रॉयल्सकडून ट्रायल्स दिली होती. दुर्दैवाने त्याची निवड होऊ शकली नव्हती. मात्र सपोर्ट स्टाफने त्याची गोलंदाजी जवळून पाहिली. त्यामुळेच त्याची 'नेट बॉलर' म्हणून निवड करण्यात आली आहे. नेट प्रॅक्टिसदरम्यान त्याने प्रभावित केल्यास त्याला आगामी घरगुती सामन्यांमध्ये फायदा होऊ शकतो. यश ठाकूरनेही आपल्या सातत्याने कामगिरीने अनेकांचे लक्ष वेधले आहे. २१ वर्षीय यश गेल्या तीन वर्षांपासून विदर्भाच्या रणजी व २३ वर्षांखालील संघाचा नियमित सदस्य राहिला आहे. आघाडीचा गोलंदाज म्हणून त्याने अनेकवेळा विदर्भाला 'ब्रेकथ्रू' मिळवून देत विजयात निर्णायक योगदान दिले आहे. अचूकता आणि वैविध्य यशची खासियत आहे.

संपादन - नरेश शेळके