कोरोनामुळे अख्ख कुटुंब हादरलं, दोन तासाच्या अंतराने घेतला बाप-लेकाचा बळी

नागपूर : शहरात कोरोना रुग्णांची संख्या दिवसेंदिवस वाढत आहे. त्यातच कोरोनामुळे कुटुंबचे कुटुंब उद्ध्वस्त होत आहेत. शुक्रवारी कोरोनाने एकाच दिवशी २८ वर्षीय तरुण पूत्र आणि पित्याचा बळी घेतला. त्यामुळे मानेवाडा येथील पेंडलवार कुटुंबीयांवर दुःखाचा डोंगर कोसळला. 

हेही वाचा - नागपूरकरांनो! आता 'आरटीओ'पासून थेट शहराबाहेर पडता येणार, सिग्नलचा त्रासही होणार कमी

दिवसेंदिवस कोरोना विक्राळरूप धारण करीत आहे. घरातील सदस्य एकाचवेळी कोरोना पॉझिटिव्ह आढळून येत आहेत. मानेवाडा भागातील रहिवासी कुटुंबावर कोरोनाने एकाच दिवशी दुहेरी आघात केला. पिता -पुत्रांचा कोरोनाने केवळ दोन तासांच्या अंतराने बळी घेतला. शाम श्रीधर पेंडलवार (२८) आणि श्रीधर गोविंदराव पेंडलवार (६७) अशी मृत पितापुत्राची नावे आहेत. पेंडलवार कुटुंब मानेवाड्यातील श्रीकृष्णनगरातील रहिवासी आहे. प्राप्त माहितीनुसार, पिता-पुत्र कोरोना पॉझिटिव्ह आढळल्यानंतर त्यांच्यावर घरीच उपचार सुरू होते. शुक्रवारी सकाळी सर्वप्रथम मुलाची प्रकृती खालावली. श्वास घेणेही शक्य होत नसल्याने त्यांना तातडीने मेडिकल रुग्णालयात हलविण्यात आले. परंतु, तोवर बराच उशीर झाला होता. डॉक्टरांनी तपासून मृत घोषित केले. या घटनेनंतर केवळ दोन तासांच्या अंतराने सकाळी १० त्या सुमारास दडील श्रीधर यांनाही अस्वस्थ वाटू लागले. श्वास घेण्यात अडचण येत असल्याची तक्रार नोंदविताच त्यांनाही मेडिकलमध्ये हलविण्यात आले. पण, उपचारापूर्वीच त्यांचाही मृत्यू झाला. दोन्ही प्रकरणांमध्ये हुडकेश्वर पोलिसांनी अकस्मात मृत्यूची नोंद केली आहे. दुहेरी आघातामुळे पेंडलवार कुटुंबावर दुःखाचा डोंगर कोसळला आहे.