काम संपवून परतीच्या प्रवासाला निघाले, गावाजवळ पोहोचले अन् सर्वच संपलं

वर्धा : अज्ञात वाहनाच्या धडकेत दोन दुचाकीस्वारांचा मृत्यू झाला, तर एक गंभीररित्या जखमी झाला. हा अपघात गुरुवारी सायंकाळी ६.४५ वाजण्याच्या सुमारास सावंगी बायपासवर घडला. मृतकांमध्ये सालोड (हि.) येथील शकील शेख (वय६०) व पंजाब धांदे (वय६५) यांचा समसावेश आहे, तर सागर परतेकी (३०) नामक युवक गंभीररित्या जखमी झाला आहे.

हेही वाचा - ‘अबे ये तो मर गया..कुवे में फेक दो’; एकाला बेदम मारहाण करून खून, दोघांना अटक

माहितीनुसार शकील शेख, पंजाब धांदे व सागर परतेकी हे तिघे एमएच २९ एस १२८ क्रमांकाच्या दुचाकीने सालोडकडे जात होते. नागपूर-यवतमाळ मार्गावर सावंगी बायपास उड्डाण पुलाजवळ अज्ञात वाहनाने त्यांच्या दुचाकीला धडक दिली. यात शकील शेख व पंजाब धांदे यांचा जागीच मृत्यू झाला, तर सागर परतेकी गंभीररित्या जखमी झाला.

माहिती मिळताच सावंगी पोलिस घटनास्थळी दाखल झाले. अपघातामुळे वाहतूक प्रभावित झाली होती. जखमीला सावंगी येथील दवाखान्यात उपचारासाठी दाखल करण्यात आले आहे. सावंगी पोलिसांनी रात्री उशीरा गुन्हा दाखल करून तपासाला सुरुवात केली आहे.