Ashadi Wari : आषाढीसाठी अकोला आगारातून २०० ‘विठाई एक्स्प्रेस’ धावणार‎! १५ जूनपासून विशेष बस

अकोला : पंढरपूर येथील आषाढी वारीसाठी‎ अकोला एसटी विभागाने २०० वारी विशेष ‘विठाई एक्स्प्रेस’ गाड्या सोडण्याचा निर्णय घेतला आहे. त्याचे नियोजन करण्यात आले असून, १५ जून ते ५ जुलैदरम्यान अकोला स्थानकावरून या गाड्या सोडण्यात येणार आहेत. तयारी‎ केली आहे.

यावर्षी ता. २९ जून रोजी आषाढी‎ एकादशी आहे. उत्सवासाठी पंढरपूर‎ येथील विठुरायाच्या दर्शनासाठी‎ अकोला जिल्ह्यातील लाखो भाविक जातात. जिल्ह्याच्या विविध भागातून निघणाऱ्या पालख्यांसोबतही‎ भाविक पायी पंढरपूरला जातात.‎ पायी जाणाऱ्या वारकऱ्यांसह‎ वाहनांद्वारे जाणाऱ्यांचीही संख्या‎ मोठी असते. त्यामुळे एसटी बसवर प्रवाशांची गर्दी होते.

गर्दीच्या काळात भाविकांची गैरसोय होऊ नये म्हणून एसटीच्या अकोला विभागाने वारीसाठी विशेष बस गाड्यांचे‎ नियोजन केले आहे.‎ वारीसाठी जाणाऱ्या भाविकांना वेळेत पोहोचता यावे म्हणून ता. १५ जूनपासून पंढरपूरकडे‎ गाड्या सोडण्यात येणार आहे. वारीनंतर ५ जुलैपर्यंत परत येणाऱ्या प्रवाशांची संख्या बघता बस सोडण्यात‎ येणार आहे. अकोला विभागात‎ एकूण नऊ आगार आहेत. या नऊ आगारातून‎ एकूण २०० बस प्रवाशांसाठी‎ उपलब्ध करून देण्यात येणार‎ आहेत.‎

‘ना नफा ना तोटा’ पद्धतीने सोडणार बस

पंढरपूर यात्रेसाठी एसटी महामंडळाकडून ‘ना नफा ना तोटा’ या तत्‍वावर‎ बस सोडण्यात येणार आहे. बसच्या क्षमतेपेक्षा ७५‎ टक्केच प्रवाशांनी एखाद्या‎ बसमधून प्रवास केला तर, ना नफा‎ तोटा या पद्धतीने बस चालते.‎ अर्थात महामंडळाचा ब्रेक- इव्हन‎ ७५ टक्के लोड फॅक्टरवर आहे.‎ त्यामुळे यात्रेच्या काळात लोड‎ फॅक्टर त्यापेक्षा कमी येणार नाही,‎ तसेच महामंडळाचे नुकसान‎ होणार नाही, याची दक्षता घेतली‎ जाणार आहे.‎

सर्व सवलती राहणार लागू

पंढरपूर यात्रेकरिता यावर्षी २०० गाड्यांचे‎ नियोजन केले आहे. या गाड्यांमध्ये एसटीतर्फे प्रवाशांना दिल्या जाणाऱ्या सर्व सवलती लागू राहणार आहेत. सध्या‎ एसटीमध्ये ७५ वर्षांवरील‎ नागरिकांना मोफत प्रवास आहे.‎ तसेच महिलांना तिकिटात ५० टक्के‎ सवलत आहे. यामुळे या वर्गाची‎ संख्या वाढण्याची शक्यता आहे.‎ याचा विचार करून यंदा बस‎ गाड्यांमध्ये वाढ करण्यात आली‎ आहे.‎ गतवर्षी वर्षी १७७ गाड्या आषाढी‎ वारीसाठी पंढरपूरकडे सोडण्यात‎ आल्या होत्या.