Akola : आज ठरणार पंचायत समितीचे कारभारी

अकोला : जिल्हा परिषदेअंतर्गत येणाऱ्या सात पंचायत समितींच्या सभापती पदाची आरक्षण सोडत काढण्यात आल्यानंतर रविवारी अकोला व तेल्हारा पंचायत समिती वगळता इतर पाच पंचायत समितीमध्ये सभापती पदासाठी निवडणूक होणार आहे, तर अकोला व तेल्हारा पंचायत समितीमध्ये सभापतींचे पद आरक्षणानुसार निश्चित झाल्याने या पंचायत समितींमध्ये केवळ उपसभापती पदासाठी निवडणूक होणार आहे. दरम्यान सदर निवडणुकीमुळे राजकीय घडामोळींना वेग आला असून इच्छुकांकडून मोर्चेबांधणी करण्यात येत आहे.

जिल्हा परिषदेअंतर्गत येणाऱ्या सात पंचायत समितीच्या सभापदी व उपसभापतींचा अडीच वर्षाचा कार्यकाळ संपत असल्याने सभापती पदासाठी गुरुवारी (ता. १३) जिल्हाधिकारी कार्यालयात आरक्षण सोडत काढण्यात आली. यावेळी सर्वात आधी पंचायत समिती सभापतीपदी ज्या प्रवर्गाचे आरक्षण होते ते वगळण्यात आले. त्यामुळे अकोट व पातूर पंचायत समिती वगळता इतर पंचायत समितींचे आरक्षण निश्चित झाले. त्यानंतर अकोट व पातूर तालुक्यात नामाप्र प्रवर्गाचे आरक्षण निश्‍चित करण्यासाठी सोडत काढण्यात आली.

सोडतीत पातूर पंचायत समितीचे सभापती पद नामाप्र महिला प्रवर्गासाठी आरक्षित करण्यात आले, तर अकोट पंचायत समितीमधील सभापतीचे पद सर्वसाधारण महिला प्रवर्गासाठी आरक्षित करण्यात आले. सदर प्रक्रियेनंतर पंचायत समिती सभापती व उपसभापती पदासाठी निवडणूक होत असल्याने राजकीय घडामोळींना वेग आला आहे.

इच्छुकांची फिल्डिंग

अकोला पंचायत समितीचे सभापती पद अनुसूचित जमाती (महिला) प्रवर्गासाठी राखीव झाले असून भाजपकडून निवडून आलेल्या सुलभा सोळंके या एकमात्र अनुसूचित जमातीच्या महिला सदस्या आहेत. त्यामुळे त्यांंना आरक्षणामुळे सभापती पदाची लॉटरी लागली. त्यासोबतच तेल्हारा पंचायत समितीमध्ये अनुसूचित जातीच्या (महिला) आरक्षित जागेवरुन निवडून आल्याने एकमात्र सदस्य आम्रपाली गवारगुरू यांची सुद्धा निवड निश्चित झाली आहे. त्यामुळे या पंचायत समितीमध्ये उपसभापती पदासाठीच रस्सीखेच होणार आहे. तर इतर पंचायत समितीमध्ये सभापती व उपसभापती पदासाठी सामना रंगणार आहे.