आगरगाव-नाचणगाव मार्गाच्या डांबरीकरणाला मुहूर्त सापडेना; सार्वजनिक बांधकाम विभाग झोपेत

आगरगाव (जि. वर्धा) : आगरगाव नाचणगाव रस्त्याची अत्यंत दुरवस्था झाल्यामुळे ‘सकाळ’ने वेळोवेळी बातम्यांद्वारे पाठपुरावा केला. तेव्हा, गत महिन्याअगोदर बांधकाम विभागाने आगरगाव-नाचणगाव या रस्त्याची याच महिन्यांत दुरुस्ती होणार, असे आश्वासन दिले होते. मात्र ते आश्‍वासन आता हवेतच विरल्याचे दिसत आहे.

रस्त्याची दुरवस्था होऊनसुद्धा बांधकाम विभाग दुरुस्तीकडे कानाडोळा करीत आहे. या रस्त्याची अतिशय दुरवस्था झाल्याने रोजचेच अपघात होत आहेत. या रस्त्याने वाळू वाहून नेणारी अवजड वाहने जास्त धावतात. त्यामुळे, या रस्त्याची पूर्णतः चाळणी झाली आहे. दिवसा रात्री वाहने चालू असताना रस्त्यावर पूर्णतः धुळीचे लोट दिसून येत आहेत.

त्यामुळे, असंख्य दुचाकीधारकांना खड्ड्यांचा अंदाज येत नसल्यामुळे, रोजचेच अपघात घडत आहेत. परिणामी रस्ता लवकरात लवकर दुरुस्ती करण्याची मागणी वाहनधारकांनी केली आहे.

जाणून घ्या : पती-पत्नीच्या भांडणात मध्यस्थी करणाऱ्या सासूची जावयाने केली हत्या

नाचणगाव ते देवळी पर्यंतचा पूर्ण रस्ता हजारो खड्ड्यांनी व्यापला आहे. त्यामुळे, अपघाताच्या प्रमाणात मोठ्या प्रमाणात वाढ झालेली दिसत आहे. रस्त्यावर उखडलेल्या खड्ड्यातील दगड चाकांमधून उसळून दुसऱ्या वाहनचालकांना लागण्याच्या घटना घडत आहेत. लहान-लहान अपघात तर नित्याचीच बाब झाली आहे. या खड्‌डेमय रस्त्यांमुळे अनेक जणांना जीव गमवावा लागला आहे. रस्ता कमी आणि खड्‌डे जास्त अशी अवस्था या रस्त्याची झाली आहे.

रस्त्यावर असतात दिवस रात्र धुळीचे लोट

या रस्त्यावरील डांबर पूर्णतः उखडले गेल्याने गिट्टी मुरूम बाहेर आला आहे. त्यामुळे, वाहने धावताना दिवसरात्र रस्त्यावर धुळीचे लोट पहावयास मिळत आहेत. त्यामुळे, अपघातात मोठ्या प्रमाणात वाढ झाली आहे.

अवश्य वाचा  : घर गहाण ठेवून घेतले कर्ज, पण धनादेश न वटल्याने शेतकऱ्याची आत्महत्या

अन्यथा आंदोलन करू
आगरगाव-नाचणगाव रस्त्याची इतकी दुर्दशा झाली की दुचाकी वाहनसुद्धा मोठ्या शिताफीने चालवावी लागत आहे. रस्ता खराब असल्यामुळे, वाहने धावताना रस्त्यावर धुळीचे लोट दिसून येत आहेत. त्यामुळे, अपघातातसुद्धा रोजचेच घडत आहेत. सार्वजनिक बांधकाम विभागाने झोपेतून जागे होऊन या रस्त्याच्या दुरुस्तीला लवकरात लवकर सुरुवात करावी, अन्यथा आंदोलन करण्यात येईल.
- विशाल थुल,
वंचित बहुजन आघाडी

(संपादन : दुलिराम रहांगडाले)