बुलडाणा : राजर्षी शाहू परिवार राबविणार ४०० गावात सामाजिक उपक्रम

बुलडाणा : देशाच्या स्वातंत्र्याची ७५ वर्षे, राजर्षी शाहू पतसंस्थेसोबत आर्थिक स्वातंत्र्याची २० वर्षे आणि संस्थेच्या ५०० कोटी ठेवींची उद्दिष्ट्यपूर्ती असा त्रिवेणी संगम साजरा करण्याचा उद्देशाने राजर्षी शाहू परिवाराच्यावतीने ९ ऑगस्ट ते १५ ऑगस्ट या सप्ताहात विविध सामाजिक उपक्रमांचे आयोजन करण्यात आले आहे. राजर्षी शाहू पतसंस्थेच्या जिल्ह्यातील ५२ शाखांच्या माध्यमातून ४०० गावांमध्ये हे उपक्रम राबविण्यात येणार आहेत. (Rajarshi Shahu Multistate Co Operative Credit Society Ltd)

देशाच्या स्वातंत्र्याचा अमृत महोत्सव साजरा होत आहे. हर घर तिरंगा यासह अनेक कार्यक्रम आयोजित करण्यात आले आहेत. महापुरुषांच्या नावाने कार्यरत असलेली राजर्षी शाहू पतसंस्था राष्ट्रवादाच्या भावनेने प्रेरित आहे. देशभक्तिपर उपक्रम राबवण्यात संस्थेची नेहमीच अग्रेसर भूमिका राहिलेली आहे.

देशाच्या स्वातंत्र्याचा अमृत महोत्सव साजरा करण्यासाठी राजर्षी शाहू परिवाराचे अध्यक्ष संदीपदादा शेळके यांच्या मार्गदर्शनात विविध सामाजिक उपक्रम राबवण्यात येणार आहेत. ९ ऑगस्ट क्रांतिदिनी बुलडाणा येथील गर्दे वाचनालयाच्या सभागृहात रक्तदान शिबिर घेण्यात येणार आहे. सकाळी ९ वाजेपासून हे रक्तदान शिबिर सुरू होईल.

युवकांनी मोठ्या संख्येने सहभागी होत रक्तदान करावे, असे आवाहन करण्यात आले आहे. यासोबतच आजी-माजी सैनिक, स्वातंत्र्य सैनिकांचा सत्कार व शहीद जवानांच्या कुटुंबीयांचा सन्मान करण्यात येणार आहे. बचतगटाच्या महिलांचा मेळावा, वृक्षारोपण, गावोगावी ध्वज वितरण व जनजागृती आदी कार्यक्रम ९ ते १५ ऑगस्ट या सप्ताहाभरात घेण्यात येणार आहेत.