मूलच्या सेवानिवृत्त प्राध्यापकाने केली काळ्या व हिरव्या तांदळाची शेती…काय आहेत फायदे जाणून घ्या

मूल (जि. चंद्रपूर) : तांदळाचा मुख्य व्यवसाय असलेल्या मूल तालुक्‍यातील धानउत्पादक पट्ट्यात प्रथमच काळ्या व हिरव्या तांदळाची (ब्लॅक व ग्रीन राईस ) लागवड करण्यात आली आहे. सेंद्रिय खताचा वापर करून हा नावीन्यपूर्ण प्रयोग येथील सेवानिवृत्त प्रा. राजेश्‍वर राजूरकर यांनी केला आहे.

हा तांदूळ गुणकारी आणि आरोग्यासाठी हितकारक असल्याचा त्यांचा दावा आहे. या वाणाच्या तांदळाची मोठी मागणी आहे. याला भावही चांगला मिळत असल्याचे त्यांचे म्हणणे आहे. मूल तालुक्‍यात धानाचे पीक मोठ्या प्रमाणावर घेतले जाते. पारंपरिक पद्धतीने शेती करणाऱ्यांची संख्या तालुक्यात अधिक आहे.

मूल येथील कर्मवीर महाविद्यालयाचे सेवानिवृत्त प्रा. राजेश्‍वर राजूरकर हे मागील दोन वर्षांपासून संशोधनपर शेती करण्यावर भर देत आहेत. रासायनिक खतांचा वापर न करता सेंद्रिय पद्धतीने शेती करण्यावर त्यांनी भर दिला आहे. प्रा. राजूरकर यांनी दोन वर्षांपासून आपल्या शेतात संशोधनपर प्रयोगाकरिता ब्लॅक (कुवुरी) भात व ग्रीन (कस्तुरी) भात या वाणाची लागवड केली आहे.

जाणून घ्या : विदर्भाच्या कॅलिफोर्नियात शिरलाय अज्ञात आजार... शेतकऱ्यांचे अर्थकारण धोक्यात

इतर तांदळाच्या तुलनेत महागडा

हा तांदूळ आरोग्यास हितकारक आणि गुणकारी आहे. पोषण मूल्य भरपूर प्रमाणात असलेला औषधी गुणधर्मयुक्त या वाणाचा कालावधी ११० ते १२० दिवस आहे. या धाची उंची ९० ते १२० सेंमी असते. एकरी उत्पादन १२ ते १५ क्‍विंटल असल्याचे सांगितले जात आहे. चंद्रपुरात पार पडलेल्या कृषी प्रदर्शन मेळाव्यात या भाताला चांगली मागणी होती. इतर वाणाच्या तुलनेत हा भात महागडा असूनही अनेकांनी या भाताची खरेदी केली.

हिरवा तांदूळ आरोग्यास उपयुक्त

ग्रीन (कस्तुरी) भाताचे वाण छत्तीसगड राज्यातील रायपूर येथील इंदिरा गांधी कृषी विद्यापीठ येथून लागवडीसाठी प्रा. राजूकर यांनी आणले आहे. या वाणाला हिरवा रंग हा क्‍लोरोफिलमुळे प्राप्त होतो. विविध अन्न प्रदर्शनात या वाणाने विविध पुरस्कार प्राप्त केले आहेत. काळ्या तांदळाप्रमाणेच हिरवा तांदूळ हा मानवी आरोग्यास अत्यंत उपयुक्त असल्याचे प्रा. राजूरकर यांनी सांगितले.

हेही वाचा  : अबब! भेंडीने मोडले सगळे रेकॉर्ड; रोपांची उंची तब्बल १२ फूट.. वाचा सविस्तर

ब्लॅक राईसचे फायदे

शरीरातील साखरेचे प्रमाण कमी करते. लठ्ठपणा रोखण्यात मदतगार, हृदय व रक्तवाहिन्यासंबंधी आजारावर प्रतिबंधात्मक उपाय, मधुमेह, कर्करोग, व्हिटॅमिन ई असल्याने डोळा, त्वचा तसेच रोगप्रतिकारक आरोग्य राखण्यासाठी उपयुक्त असा ब्लॅक राईस (कुवुरी) वाण आहे, असे प्रा. राजूरकर यांनी सांगितले.

(संपादन : दुलिराम रहांगडाले)