नागरिक किती दिवस करणार सितेपार-किसनपूर पुलावरून प्रवास...आता तरी शासनाने जागे व्हावे

पांढरी (जि. गोंदिया) : सितेपार-किसनपूर मार्गावरील पूल वर्षभरापासून नादुरुस्त आहे. या गावांतील नागरिकांना आवागमन करण्यासाठी या पुलाव्यतिरिक्त दुसरा पर्याय नाही. त्यामुळे जीव धोक्‍यात घालून आजही नागरिकांचा प्रवास सुरू आहे. संबंधित विभागाने लक्ष देऊन पुलाची दुरुस्ती करावी, अशी मागणी नागरिकांनी केली आहे.

मागील वर्षीच्या पावसाळ्यात जोरदार पावसाने पांढरी परिसरात हजेरी लावली होती. त्यामुळे पुराने रौद्ररूप धारण केले होते. सितेपार-किसनपूर मार्गावरील पुलावरून पुराचे पाणी वाहत होते. त्याचवेळी पुलाचा खालील व बाजूचा बराचसा भाग पाण्याच्या प्रवाहात वाहून गेला होता. या घटनेची माहिती तालुकास्तरापासून तर जिल्हास्तरापर्यंत वाऱ्यासारखी पसरली होती.

पुलाची अवस्था "जैसे थे'च

लोकप्रतिनिधींपासून तर, बांधकाम विभागाच्या अधिकारी, कर्मचाऱ्यांनी हजेरी लावली होती. पूल वाहतुकीसाठी बंद करण्यात आला होता. तसेच लवकरात लवकर पुलाच्या दुरुस्तीचे आश्‍वासन दिले होते. या बाबीला आता वर्ष लोटला आहे. पुन्हा पावसाळ्याला सुरुवात झाली आहे. मात्र, सीतेपार-किसनपूर मार्गावरील पुलाची अवस्था "जैसे थे' आहे.

तीन गावांना जोडणारा एकमात्र पूल

स्थानिक प्रशासनामार्फत कागदी कारवाई पूर्ण करून संबंधित विभागाला पाठविण्यात आली होती. परंतु, सार्वजनिक बांधकाम विभागाचा कामचुकारपणा पूल दुरुस्तीला भोवल्याचे बोलले जात आहे. सीतेपार ही गटग्रामपंचायत असून, यामध्ये किसनपूर व शिकारीटोला या गावांचा समावेश आहे. 2011 च्या जनगणनेनुसार 1121 एवढी लोकसंख्या आहे. हा पूल तीन गावांना जोडणारा एकमात्र असून, शेतकरी, विद्यार्थ्यांपासून तर स्थानिक नागरिकांना प्रवासासाठी अतिमहत्त्वाचा आहे. दरम्यान, सार्वजनिक बांधकाम विभागाने आतातरी वेळीच लक्ष देऊन पुलाची दुरुस्ती करावी, अशी मागणी नागरिकांनी केली आहे.

असं घडलंच कसं : बदली कर्मचारी ठाण मांडून; तरीही होणार कार्यशाळा..वाचा सविस्तर...

साहेब, वाट कसली पाहता...!

वर्षभरापासून पुलाची दुरुस्ती करण्यास बांधकाम विभाग अपयशी ठरला आहे. एखादा अपघात किंवा घटना घडल्यावर तुम्हाला जाग येईल काय? पूल दुरुस्तीसाठी कसली वाट बघतायं, असा संतप्त सवाल नागरिकांनी उपस्थित केला आहे.