कोरोना ब्रेकिंग : अमरावतीत वृद्धेचा मृत्यू, एकाची प्रकृती गंभीर 

अमरावती : स्थानिक हबीबनगर येथील 74 वर्षीय कोरोनाबाधित वृद्धेचा मृत्यू झाला. यासोबतच कोरोनाने मृतांची संख्या 19 झाली आहे. तर जिल्हा कोविड रुग्णालयात उपचारार्थ दाखल एका व्यक्तीची प्रकृती गंभीर आहे. 

हबीबनगर येथील संबंधित 74 वर्षीय महिलेस कोरोनासदृश लक्षणे असल्याने तिने जिल्हा कोविड रुग्णालयात घशातील लाळेचा नमुना तपासणीसाठी दिला होता. त्यानंतर संबंधित महिला घरी परत आली. रविवारी तिचा घरीच मृत्यू झाला. त्यापाठोपाठ सोमवारी तिचा कोरोना चाचणी अहवाल पॉझिटिव्ह आला. संबंधित महिलेच्या मृत्यूची पुष्टी जिल्हाधिकारी शैलेश नवाल यांनी मंगळवारी केली. 

हेही वाचा - हृदयद्रावक घटना! आठ महिन्यांची गर्भवती गेली रुग्णालयातून पळून; भूमकाजवळ गेली असता झाला अंत
 

यासोबतच कोविड रुग्णालयात उपचारार्थ दाखल रुग्णांपैकी एकाची प्रकृती गंभीर आहे. त्याचे वडीलसुद्धा कोरोनाबाधित आहेत, तर बहीण आरोग्यसेवेत आहे. संबंधित व्यक्ती आणखी एका वेगळ्या आजाराने ग्रस्त असल्याचे जिल्हाधिकाऱ्यांनी सांगितले. जिल्हा कोविड रुग्णालय नागपूर येथे तर स्थानिक खासगी रुग्णालयात, पीडीएमसीमध्ये रुग्ण असल्याची माहिती जिल्हाधिकाऱ्यांनी दिली. 
 

खासगी डॉक्‍टरांसाठी सूचना

 सर्दी, ताप, खोकल्याचे रुग्ण खासगी रुग्णालयात उपचारासाठी जातात. डॉक्‍टर लक्षणानुसार कोरोना चाचणीचा सल्ला देतात, काही जण सल्ला ऐकतात तर काही रुग्ण धुडकावून लावतात. त्यामुळे त्या कुटुंबातील व्यक्तींना बाधा होते. यासाठी खासगी डॉक्‍टरांसाठी मार्गदर्शक सूचना दिल्या जातील, असे जिल्हाधिकाऱ्यांनी सांगितले. 
 

मृत्यू संख्या चारने वाढणार

 जिल्ह्यातील तीन ते चार व्यक्ती नागपूरला आतापर्यंत परस्पर दाखल झाले. तेथेच त्यांचे कोरोना चाचणी अहवाल पॉझिटिव्ह आले आणि उपचारादरम्यान त्यांचा मृत्यू झाला. ती संख्या धरून जिल्ह्यातील मृतांचा आकडा 23 च्या घरात असल्याचे जिल्हाधिकाऱ्यांनी सांगितले.