चुलतभावाच्या मनात करणी केल्याच्या संशयाचे भूत...मग पुतण्यावर केले कोयत्याने वार

उमरखेड (जि. यवतमाळ) : रोजमजुरी करीत असताना माझ्यापेक्षा चांगला राहतो. माझ्यावर करणी केली या संशयावरून चुलतभावावरील राग मनात धरून चुलतकाकाने सात वर्षीय पुतण्यावर कोयत्याने वार करून त्याचा निर्घृण खून केला. मध्यस्थीसाठी धावलेल्या काकूवरही कोयत्याने वार करून गंभीर जखमी केल्याची घटना गुरुवारी (ता. 4) दुपारी दोन वाजतादरम्यान तालुक्‍यातील बिटरगाव येथे घडली.

गणेश (सद्‌गुरु) नत्थू पेलेवाड (वय 7) असे मृत पुतण्याचे; तर अंजनाबाई सटवा पेलेवाड (वय 62 ) असे गंभीर जखमी असलेल्या काकूचे नाव आहे.

करणी केल्याचा संशय

बिटरगाव येथील नत्थू पेलेवाड व आरोपी किसन शेषेराव पेलेवाड हे दोघे चुलतभाऊ शेजारी शेजारी राहतात. दोघेही रोजमजुरीचे काम करून आपला जीवनचरितार्थ चालवितात. मात्र नत्थू हा आपल्यापेक्षा चांगला राहतो. त्याने माझ्यावर जादूटोणा करून करणी केल्याचा संशय किसन पेलेवाडच्या मनात निर्माण झाला होता. त्यामुळे किसन गुरुवारी (ता. 4) नत्थूच्या गैरहजेरीत हातात कोयता घेऊन त्याच्या घरात शिरला.

काकूवरही केले सपासप वार

रागाच्या भरात त्याने घरात असलेला पुतण्या गणेशच्या कानावर कोयत्याने वार करून त्याला ठार केले. ही घटना आरोपीची काकू अंजनाबाईला समजताच ती मध्यस्थी करण्यासाठी धावली. मात्र आरोपीने मृताची आजी व आरोपीची काकू अंजनाबाईच्या पोटावर कोयत्याने वार केले. या घटनेत ती गंभीर जखमी झाली. तिच्यावर रुग्णालयात उपचार सुरू असून ती गंभीर अवस्थेत आहे.

हेही वाचा : फुटली नाही मिशी न विकतोय दारूची शिशी! या जिल्ह्यात दारूतस्करी जोमात

आरोपी पोलिस ठाण्यात हजर

घटना घडल्यानंतर आरोपी किसन स्वतःच्या हाताची नस कापून पोलिस ठाण्यात हजर झाला. त्यामुळे पोलिसांनी त्याला अटक केली. या घटनेचा तपास ठाणेदार विजय चव्हाण करीत आहेत.