दानापूरवासी गावात परतले; जातीय अत्याचाराचा आरोप

चांदूररेल्वे (जि. अमरावती) : चांदूर रेल्वे तालुक्यातील दानापूरवासी शनिवारी रात्री गावात परतले. गंजी जळलेल्या शेतकऱ्याला आर्थिक मदत मिळणार असून, आरोपींना लवकरच अटक करण्याचे आश्वासन त्यांना देण्यात आले. यासाठी एसपी अविनाश बारगळ तडकाफडकी दानापूरमध्ये शनिवारी रात्री पोहोचले होते.

जातीय अत्याचाराला कंटाळून दानापूरच्या अनुसूचित जातीच्या गावकऱ्यांनी शुक्रवारी (ता. २२) गाव सोडले होते. या प्रकरणी महाराष्ट्र राज्याचे गृहमंत्री दिलीप वळसे पाटील यांनी अमरावती दौऱ्यावर असताना त्वरित दखल घेतली आणि कार्यवाही करण्याची सूचना अमरावती पोलिस अधीक्षक (ग्रा) अविनाश बारगड यांना दिल्या होत्या.

त्यामुळे अमरावती ग्रामीण पोलिस अधीक्षक अविनाश बारगळ, चांदूररेल्वेचे उपविभागीय अधिकारी इब्राहिम चौधरी, समाज कल्याण प्रादेशिक उपायुक्त सुनील वारे यांनी शनिवारी रात्री ८ वाजता चांदूररेल्वे तालुक्यातील दानापूरच्या पीडित अनुसूचित जातीच्या गावकऱ्यांची भेट घेतली. रस्ता अडवणूक प्रकरणी दाखल झालेल्या अ‍ॅट्रोसिटी प्रकरणात आठ दिवसांत निर्णय देऊ आणि सोयाबीन गंजी जाळण्याच्या प्रकरणातील आरोपींना अटक करू असे पोलिस अधीक्षक (ग्रा.) अविनाश बारगळ यांनी सांगितले. समाज कल्याण आयुक्त सुनील वारे यांनी सोयाबीन गंजी जाळल्याच्या प्रकरणी पीडित शेतकऱ्याला आर्थिक मदत करण्यात येईल असे सांगितल्यानंतर दानापूरच्या अनुसूचित जातीच्या गावकऱ्यांनी आंदोलन मागे घेतल्याची माहिती प्राप्त झाली आहे.