Lightning : वीज कोसळून संपूर्ण कुटूंबच ठार

देसाईगंज (जि. गडचिरोली) - सध्या राज्यात अवकाळी पावसाचे तांडव सुरू असताना देसाईगंज तालुक्यात वीज कोसळून संपूर्ण कुटूंबच ठार झाल्याची दुर्दैवी घटना सोमवार (ता. २४) सायंकाळी ५ वाजता घडली.

वडसा-कुरखेडा मार्गावरील दूध डेअरी (तुळशी फाटा) जवळ वीज पडून संपूर्ण कुटूंबच ठार झाल्याची घटना घडली. भारत लक्ष्मण राजगडे (वय ३२) रा. आमगाव, ता. देसाईगंज, त्यांची पत्नी अंकिता भारत राजगडे (वय ३०) हे दोघेही पती-पत्नी आपल्या दोन्ही लहान मुलांसह गरगळा येथुन लग्न लावून येत असताना मार्गातच हलक्या पावसाची सुरुवात झाली. लगेच विजांचा कडकडाट सुरू झाला.

वीज कडाडत असल्याने राजगडे यांनी दूध डेअरी जवळ एका झाडाच्या खाली आश्रय घेतला. पण अचानक वीज अंगावर कोसळल्याने राजगडे कुटूंबातील चारही जण जागीच ठार झाले. या घटनेची माहिती मिळताच देसाईगंज पोलिसांनी घटनास्थळ गाठून चारही जणांचे मृतदेह उत्तरीय तपासणीकरिता देसाईगंज ग्रामीण रुग्णालयात पाठविले. पुढील तपास पोलिस निरीक्षक रासकर यांच्या मार्गदर्शनात सुरु आहे.