सावधान! वाळूघाटांवर आता ड्रोन कॅमेऱ्याची नजर, वाळूचोरी करणाऱ्यांचे धाबे दणाणले

गोंदिया : वाळूचोरीवर आळा घालण्यासाठी जिल्हाधिकारी कार्यालयाने ड्रोन कॅमेराच्या वापराला सुरुवात केली आहे. या उपक्रमामुळे वाळू चोरीला नक्कीच आळा बसेल, असा विश्‍वास व्यक्त करण्यात येत आहे. नुकतीच अपर जिल्हाधिकारी राजेश खवले यांनी या व्यवस्थेची पाहणी केली.

जिल्ह्यातील वाळू घाटांवरून मोठ्या प्रमाणात वाळू चोरीला जात आहे. त्यामुळे शासनाचा लाखो रुपयांचा महसूल बुडत आहे. ट्रक, ट्रॅक्‍टरने वाळू वाहतूक होत असल्याने रस्त्यांचीदेखील पुरती वाट लागली आहे.

प्रशासनाच्या अधिकाऱ्यांवर वाळू माफियांचे हल्लेदेखील वाढले आहेत. दरम्यान, माफियांच्या मुसक्‍या आवळण्यासाठी जिल्हा प्रशासनाने कठोर पाऊल उचलले आहे. ड्रोन कॅमेरा त्यांची हालचाल टिपणार आहे.

जाणून घ्या : वाळू मिळत नसल्याने अनेकांच्या घरकुलांचे स्वप्न अर्धवटच

तथापि, काल गुरुवारी तालुक्‍यातील डांगुरली आणि तेढवा घाटावर वाळू चोरीला आळा घालण्याकरिता ड्रोन कॅमेरा उडविण्यात आला. या कार्यवाहीत एकही वाळू चोरी करणारा ट्रक दिसून आला नाही. ही मोहीम रात्रीच्या वेळीसुद्धा राबविली जाणार आहे. त्यामुळे वाळूचोरीची प्रकरणे नक्कीच उघडकीस येतील, असा प्रशासनाला विश्‍वास आहे.

अवश्य वाचा : `कन्हाळगाव' अभयारण्य जाहीर; राज्य वन्यजीव मंडळाच्या बैठकीत निर्णय

वाळूचोरीची वाहने सापडल्यास रजिस्ट्रेशन रद्द

ड्रोन कॅमेरामध्ये आढळलेली वाहने उपप्रादेशिक परिवहन अधिकारी गोंदिया यांच्याद्वारे जप्त केली जातील. अशा वाहनांचे रजिस्ट्रेशनदेखील रद्द करण्यात येणार आहेत. तसेच वाळू चोरीच्या प्रकरणात गुंतलेल्या व्यक्तींची ड्रोन शूटिंगच्या आधारे ओळख पटवून त्याआधारे पोलिस स्टेशनला गुन्हा दाखल केला जाणार आहे. ड्रोन पाहणी प्रात्यक्षिकामध्ये अपर जिल्हाधिकारी राजेश खवले, महसूल सहायक किशोर राठोड व विभागाचे अन्य अधिकारी-कर्मचारी सहभागी झाले होते. ड्रोन पाहणीमुळे वाळूचोरी प्रकरणांना आळा बसेल, असा विश्‍वास प्रशासनाने व्यक्त केला आहे.
 

(संपादन : दुलिराम रहांगडाले)