आनंदवार्ता! पंधरा रुग्ण कोरोनामुक्त, रुग्णालयातून होणार सुटी

अमरावती : उपचाराअंती बरे झालेल्या तब्बल पंधरा कोरोनाबाधित  रुग्णांना येत्या तीन दिवसात टप्प्याटप्प्याने डिस्चार्ज दिला जाणार आहे. 

स्थानिक कमेला ग्राउंड, हैदरपुरा आणि तारखेडा येथील प्रत्येकी एका कोरोनाबाधित महिलेचा 22 ते 24 एप्रिल दरम्यान मृत्यू झाला होता. संबंधित कुटुंबातील सदस्यांचे नमुने पॉझिटिव्ह आढळल्याने त्यांना कोविड रुग्णालयात उपचारार्थ दाखल करण्यात आले होते. सलग 14 दिवसांच्या उपचारानंतर त्यांचे नमुने प्रथम तपासणी अहवालात निगेटिव्ह आढळले आहेत.

संबंधितांचे नमुने दुबार तपासणीसाठी पाठविले जात आहेत. हेही नमुने निगेटिव्ह आल्यास येत्या तीन दिवसात त्यांना कोविड रुग्णालयातून डिस्चार्ज दिला जाणार असल्याची माहिती जिल्हाधिकारी शैलेश नवाल यांनी दिली. यापूर्वी हाथीपुरा येथील एका कुटुंबातील चौघांसह एकूण पाच जणांना बरे झाल्यानंतर जिल्हा कोविड रुग्णालयातून डिस्चार्ज देण्यात आला होता. शिराळा येथील कोरोना बाधित मृताच्या अधिक संपर्कातील व्यक्तींना डॉ. गोडे महाविद्यालयात तर कमी संपर्कातील व्यक्तींना वलगाव येथील क्वारंटाइन केंद्रात ठेवण्यात आले आहे.

जाणून घ्या - शहर म्हणजे 'कोरोना'ची उपराजधानी; माफ करा... आम्ही तुम्हाला गावात येऊ देणार नाही

सद्य:स्थितीत जिल्ह्यात तब्बल 240 व्यक्ती क्वारंटाइन आहेत. वरुड येथील एका अधिकाऱ्याचा नमुना निगेटिव्ह आढळला आहे; तथापि त्यांना काही दिवस होम क्वारंटाईन राहण्यास सांगण्यात आलेले आहे. कंवरनगर येथील यापूर्वी चार व्यक्ती पॉझिटिव्ह तर चार व्यक्ती निगेटिव्ह आढळल्या आहेत. स्थानिक मालवीय चौक ते चित्रा चौक या मार्गावर राहणाऱ्या एका राजकीय नेत्याच्या कुटुंबातील सात ते आठ व्यक्ती अधिक संपर्कातील आहेत. त्यांनाही बडनेरा मार्गावरील महाविद्यालयात क्वारंटाइन करण्यात आलेले आहे.

हाथीपुरा येथे 2 एप्रिलला एका कोरोनाबाधित व्यक्तीचे निधन झाल्यानंतर त्याच्या कुटुंबातील चार व अन्य एक, अशा पाच रुग्णांना गत आठवड्यात डिस्चार्ज देण्यात आला होता. शहरात कोरोना संक्रमितांना रुग्णालयातून डिस्चार्ज मिळण्याची संख्या हळूहळू वाढते आहे, हे अत्यंत आशादायी चित्र मानले जात आहे.