या जिल्ह्यातही केला कोरोनाने शिरकाव; महिला रुग्ण आढळली पॉझिटिव्ह 

भंडारा : तालुक्‍यातील गराडा येथील 45 वर्षीय महिला रुग्णाचा कोरोना तपासणी अहवाल पॉझिटिव्ह आला आहे. ही जिल्ह्यातील पहिलीच कोरोना पॉझिटिव्ह रुग्ण आहे. त्यामुळे नागरिकांसह प्रशासनानेही चिंता व्यक्त केली आहे. ही महिला ज्या भागातील रहिवासी आहे, त्या परिसरातील पाच किलोमीटरचा परिसर प्रतिबंधित क्षेत्र घोषित करण्यात आला असून, चार ते पाच गावांतील नागरिकांना घरातच थांबावे लागणार आहे. संबंधित कुटुंबीय व संपर्कात आलेल्या आरोग्य अधिकाऱ्यांची तपासणी करण्यात येत आहे. 

अवश्य वाचा- सहा दिवसांच्या दिलाशानंतर पॉझिटिव्ह अहवालाने धक्का 

गराडा येथे नातेवाईकाकडे आलेली महिला क्षयरोगावर उपचार घेत आहे. ती गेल्या एक महिन्यापासून गराडा (बासोरा) येथे राहत आहे. या महिलेची कोरोना तपासणी केली असता अहवाल पॉझिटिव्ह आला आहे. त्यामुळे जिल्ह्यात खळबळ उडाली असून, याबाबत सोशल मीडियावर वेगवेगळ्या बातम्या पसरल्या आहेत. प्रशासनाने सदर महिला रुग्णाला आयसोलेशन वॉर्डात दाखल केले असून, तिच्या कुटुंबीयांचे नमुनेही तपासणीसाठी पाठविण्यात येत आहेत. 

गराडा येथील महिला रुग्णाचा अहवाल पॉझिटिव्ह आल्यामुळे प्रशासनाकडून गराडा, गराडा बुज., मेंढा, बासोरा बोरगाव (पुनर्वसन) या पाच किलोमीटरचे क्षेत्र कॅटेन्मेंट झोन म्हणून घोषित केले आहे. त्यामुळे या भागातील लोकांना घरातच थांबून राहावे लागणार असून त्यांना घरपोच जीवनाश्‍यक वस्तू व औषधांचा पुरवठा करण्यात येईल, असे जिल्हाधिकारी एम. जे. प्रदीपचंद्रन यांनी सांगितले आहे.