ज्वारीचे फुटवेच बनले त्यांच्यासाठी विष...अचानक चार गाई दगावल्या

उमरखेड (जि. यवतमाळ) : पैनगंगा अभयारण्यातील पैनगंगा नदीकाठी चरणाऱ्या कळपातील गाईंनी ज्वारीचे फुटवे खाल्ले. त्यामुळे विषबाधा होऊन या चार गायींचा मृत्यू झाला. दरम्यान, पशुधन विकास अधिकारी यांच्या प्रसंगावधानाने कळपातील इतर 25च्यावर गायींचे प्राण वाचविण्यात यश आल्याची घटना बुधवारी (ता. 3) तालुक्‍यातील परोटी (वन) येथे घडली.

परोटी (वन) येथील शंभराच्यावर गायींचा कळप नदी काठावर चरत होता. मात्र चरता चरता अचानकपणे गायी जमिनीवर कोसळत होत्या. हे पाहून घाबरलेल्या गुराख्याने गावात पळ काढला. त्याने या घटनेची सूचना केल्याने गावकरी घटनास्थळावर पोहोचले. यावेळी चार गायींचा जागीच मृत्यू झाला होता. तर अनेक गायींना त्रास होत असल्याचे जाणवले.

त्यामुळे गावकऱ्यांनी लगेच पशुधन विकास अधिकारी डॉ. योगेश श्‍यामराव पाटील यांना घटनेबाबत कळविताच तत्काळ त्यांनी घटनास्थळ गाठून जवळपास 25च्यावर गायींचे प्राण वाचविले. सध्या अत्यवस्थेत असलेल्या गायींवर उपचार सुरू असून, इतरही कळपातील गायींची तपासणी करण्यात आली आहे.

अहवालानंतर कळणार गायींचा कशाने झाला मृत्यू

पैनगंगा नदीपात्रात मराठवाड्याच्या हद्दीकडून कुणीतरी शेतकऱ्याने ज्वारीचे पीक घेतले आहे. त्या ज्वारीचे फुटवे (पील) गाईंनी खाल्ल्यामुळे ही घटना घडली असल्याचा प्राथमिक अंदाज डॉ. योगेश पाटील यांनी व्यक्त केला आहे. मृत गायीचे शवविच्छेदन करण्यात आले असून, अहवालानंतरच गायींचा मृत्यू कशामुळे झाला, हे कळणार आहे.

हेही वाचा : चुलतभावाच्या मनात करणी केल्याच्या संशयाचे भूत...मग पुतण्यावर केले कोयत्याने वार

नुकसानभरपाई वसूल करावी

मात्र ज्या गायींचे प्राण डॉ. योगेश पाटील यांनी वाचविले, त्यांच्यासाठी ते देवदूतच ठरले आहेत. जवळपास लाखो रुपये किमतीच्या गायींचे प्राण गेल्याने नदीपात्रात अवैध शेती करणाऱ्यांकडून शासन व प्रशासनाने नुकसानभरपाई वसूल करून द्यावी, अशी मागणी मृत गायीचे मालक प्रकाश तगरे यांनी केली आहे.