चक्‍क नवरदेवच निघाला कोरोना पॉझिटिव्ह! वऱ्हाड्यांचा शोध सुरू, प्रशासनाची उडाली झोप!

सकाळ वृत्तसेवा
Friday, 10 July 2020

पिपरी (मेघे) येथील झालेल्या लग्नाने प्रशासनाची झोप उडविली आहे. या लग्नातील नवरदेवच कोरोनाबाधित असल्याचे पुढे आल्याने अख्खे वऱ्हाड पॉझिटिव्ह निघते की काय, असा प्रश्न निर्माण झाला आहे. आज आलेल्या अहवालात नवरदेवाची आई, नवरी आणि या लग्नाला उपस्थित असलेल्यांपैकी इतवारा परिसरातील दोन वऱ्हाडी पॉझिटिव्ह आल्याने प्रशासनाला धडकी भरली आहे.
 

वर्धा : शहरात कोरोनाबाधितांची संख्या दिवसेंदिवस वाढत असून त्याला प्रतिबंध घालण्याकरिता जिल्हा प्रशासनाकडून तत्काळ उपाययोजना म्हणून वर्ध्यात शुक्रवार (ता. 10 ) पासून सोमवार (ता.12 ) पर्यंत लॉकडाउन घोषित करण्यात आला आहे. या काळात केवळ वैद्यकीय सेवा आणि औषधी दुकाने तेवढी सुरू राहणार आहेत.

पिपरी (मेघे) येथील झालेल्या लग्नाने प्रशासनाची झोप उडविली आहे. या लग्नातील नवरदेवच कोरोनाबाधित असल्याचे पुढे आल्याने अख्खे वऱ्हाड पॉझिटिव्ह निघते की काय, असा प्रश्न निर्माण झाला आहे. आज आलेल्या अहवालात नवरदेवाची आई, नवरी आणि या लग्नाला उपस्थित असलेल्यांपैकी इतवारा परिसरातील दोन वऱ्हाडी पॉझिटिव्ह आल्याने प्रशासनाला धडकी भरली आहे.

या लग्नात आलेल्या वऱ्हाड्यांचा शोध घेत हाती आलेल्यांची कोरोना चाचणी करण्यात आली. यात आज सकाळी प्राप्त झालेल्या अहवालानुसार कोरोनाबाधित नवरदेवाची आई आणि स्वत: नवरी कोरोनाबाधित असल्याचा अहवाल आला आहे. या दोघींच्या संपर्कात आलेल्या व्यक्तींचा शोध सुरू असताना दुपारी या लग्नात गेलेल्या दोघांचा अहवाल पॉझिटिव्ह आल्याची माहिती जिल्हा शल्यचिकित्सकांनी दिली. हे दोघे इतवारा बाजार परिसरातील रहिवासी असून हा भाग दाटीवाटीचा असल्याने या परिसरात त्यांचा आणखी कोणाशी संपर्क आला याचा शोध घेण्यात येत आहे.

आतापर्यंत 30 जणांचे घेतले नमुने
या लग्न समारंभात उपस्थित असलेल्यांपैकी एकूण 30 जणांचे स्वॅब घेण्यात आले होते. त्यापैकी चार जणांचा अहवाल पॉझिटिव्ह आला आहे. यामुळे येत्या दिवसात आणखी किती जणांचा स्वॅब पॉझिटिव्ह येईल हे सांगणे सध्या कठीण आहे. यामुळे वर्धेकरांत भीतीचे वातावरण निर्माण झाले आहे.

शहरासह लगतच्या ग्रामपंचायत परिसराचाही समावेश
आज जाहीर करण्यात आलेल्या लॉकडाउनमध्ये आसपासच्या ग्रामपंचायतीमध्येही लॉकडाउन राहणार आहे. यात पिपरी (मेघे), साटोडा, नालवाडी, सावंगी (मेघे), उमरी (मेघे), बोरगाव, म्हसाळा, नटाळा आणि qसदी (मेघे) आदी गावांचाही समावेश करण्यात आला आहे. या गावात या संचारबंदीचा प्रभाव राहणार आहे. या काळात या भागात नागरिकांनी घरीच रहावे असे आवाहन करण्यात आले आहे.

 सविस्तर वाचा -  विघ्नहर्त्याचा उत्सवच कोरोनामुळे अडचणीत! भक्‍तांच्या उत्साहावर विरजण

यवतमाळ येथील व्यक्ती कोरोनाबाधित
सेवाग्राम रुग्णालयात उपचाराकरिता आलेला यवतमाळ येथील व्यक्ती कोरोनाबाधित असल्याचे पुढे आले आहे. त्याच्यावर उपचार सुरू आहेत  

संपादन - स्वाती हुद्दार 


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Groom was corona positive