Unseasonal Rain : चार हजार हेक्टरला अवकाळीचा फटका! मोताळा, नांदुरा, खामगाव व संग्रामपूरला सर्वाधिक नुकसान

बुलडाणा- मोताळा - नुकतेच झालेल्या अवकाळी पावसाने जिल्ह्यात मोठे नुकसान झाले आहे. आठ तालुक्यांमध्ये ४१८२ हेक्टर क्षेत्र या पावसामुळे बाधित झाले आहे. जिल्हाभरातील जवळपास १६६ गावांना पावसाचा फटका बसला आहे. काही भागात तुरळक गार पडल्याची माहिती आहे.

मोताळा तालुक्यात बुधवारी (ता. २) रात्री वादळी वारा व विजांच्या कडकडाटासह अवकाळी पावसाने हजेरी लावली. त्यामुळे कांदा, मका, रब्बी ज्वारी व गहू पिकांना फटका बसला आहे. मोताळा तालुक्यातील ९ गावातील १००७ शेतकऱ्यांचे ७०२ हेक्टर क्षेत्र बाधित झाल्याचा प्राथमिक अंदाज कृषी विभागाने वर्तवला आहे.

मोताळा तालुक्यात मागील तीन ते चार दिवसांपासून ढगाळ वातावरण आहे. दरम्यान, बुधवारी (ता. २) रात्री अकरा वाजताच्या सुमारास सुसाट वारा व विजांच्या कडकडाटासह अवकाळी पावसाने हजेरी लावली.

त्यामुळे तालुक्यातील कोथळी, लोणघाट, इब्राहीमपूर, जयपूर, जनुना, आडविहीर, वरुड, तिघ्रा, महालपिंप्री या नऊ गावातील १००७ शेतकऱ्यांचे ७०२ हेक्टर क्षेत्र बाधित झाल्याचा प्राथमिक अंदाज कृषी विभागाने वर्तवला आहे. या मध्ये कांदा, मका, रब्बी ज्वारी व काही प्रमाणात गहू पिकाचा समावेश असल्याची माहिती आहे.

मात्र पंचनामे झाल्यावर नुकसानीची वास्तविक आकडेवारी कळणार आहे. दरम्यान, कोथळी शिवारात वादळी वाऱ्यामुळे मका पीक भुईसपाट झाल्याचे दिसून आले. तसेच इतरही पिकांना अवकाळी पावसाचा फटका बसला आहे.

सुसाट वारा व विजांचा तांडव सुरू असल्याने काही ठिकाणी विद्युत पुरवठा खंडित झाला होता. मोताळा शहरातही मध्यरात्री दीड वाजेपर्यंत बिजली गुल झाली होती. गुरुवारी (ता. ३) दिवसभर ढगाळ वातावरण कायम होते.

दरम्यान, शेतकऱ्यांच्या हातातोंडाशी आलेला घास या नैसर्गिक आपत्तीमुळे हिरावल्या गेला आहे. त्यामुळे बळीराजा आर्थिक संकटात सापडला आहे. प्रशासनाने या नुकसानीचे तातडीने पंचनामे करून पीडित शेतकऱ्यांना आर्थिक मदत मिळवून द्यावी, अशी मागणी शेतकऱ्यांमधून होत आहे.