गडचिरोली : जगभर हाहाकार माजविणाऱ्या कोविड-19 म्हणजेच कोरोना या विषाणूजन्य आजाराने भारतातही थैमान घातले आहे. गडचिरोली जिल्ह्यात कोरोनाचा शिरकाव झाल्यास या आजाराबाबत आवश्यक ती खबरदारी घेऊन रुग्णांवर उपचार करण्यासाठी सर्च संस्थेचा मॉं दंतेश्वरी दवाखाना सज्ज झाला आहे.
विविध उपाययोजनांची पूर्वतयारी रुग्णालयाने केली असून त्या दृष्टीने कार्यकर्त्यांना प्रशिक्षण दिले जात आहे.
कोरोना आजारांसंबंधी रुग्णांची जागृती, प्रतिबंधात्मक उपाययोजना, सर्व स्टाफचे प्रशिक्षण, स्वच्छता व देखरेख, आवश्यक साहित्य पुरवठा, रुग्ण नोंदणी अशा समिती गठित करण्यात आल्या आहेत. नोंदणी खिडकीच्या पुढे तीन तीन फूट अंतरावर डबे आखण्यात आले असून उपचारासाठी आलेल्या रुग्णांनी सुरक्षित अंतर ठेवण्याच्या सूचना नियमित दिल्या जात आहेत.
या आजारांसंबंधी माहिती व आवश्यक काळजी घेण्यासंदर्भात उद्घोषणा सातत्याने दिल्या जात आहेत. कोरोना आजाराचे संशयित रुग्ण आढळल्यास त्यांना कसे हाताळायचे, डॉक्टर्स, परिचारिका व इतरही रुग्णालय स्टाफची काय भूमिका असेल, कोरोनाची लक्षणे असलेल्या रुग्णाला गावातून आणायचे असल्यास वाहनचालकाने काय खबरदारी घ्यावी याचेही प्रशिक्षण चालकांना देण्यात आले आहे.
मेडिकलमध्ये औषधी घेताना तेथील स्टाफने काय काळजी घ्यावी यासंदर्भात सूचनाही देण्यात आल्या आहेत. सर्चच्या संचालक डॉ. राणी बंग आणि समन्वय समितीचे गटप्रमुख डॉ. योगेश काळकोंडे यांच्या नेतृत्वात डॉ. वैभव तातावार, डॉ. मृणाल काळकोंडे, डॉ. दत्ता भलावी, डॉ. मयूरी पेंदाम, डॉ. मयूर भानारकर आणि डॉ. स्मिता मोरे या वैद्यकीय चमूसह संपूर्ण स्टाफने उपचाराचे नियोजन केले आहे.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.