बैलगाडी खाली करत होता शेतकरी, अचानक सात जण आले अन् उडाला अंगाचा थरकाप

अमरावती : जिल्ह्याच्या वडनेरगंगाई गावात रस्त्याच्या वादातून कीटकनाशक पाजून हत्येचा प्रयत्न झाला. शेख आदिल उर्फ शेख चांद शेख कालू (वय 38, रा. वडनेर गंगाई), असे प्रकृती गंभीर असलेल्या व्यक्तीचे नाव आहे.

हेही वाचा - खुनाच्या घटनेनं हादरली उपराजधानी: उपमुख्यमंत्री जाताच कुख्यात गुंडाचा दगडानं ठेचून खून 

येवदा पोलिसांनी शेख आदिल यांच्या तक्रारीवरून मोहंमद कासम, मो. इब्राहीम, मो. कय्युम, मो. फिरोज, फयाजउद्दीन, मो. फारुक, वसीमोद्दीन (सर्व, रा. वडनेर गंगाई) अशा सात जणांविरुद्ध शनिवारी (ता. सहा) गुन्हा दाखल केला. रविवारपर्यंत (ता. सात) त्यापैकी कुणालाही अटक झाली नसल्याचे पोलिसांनी सांगितले. शुक्रवारी (ता. 5) शेख आदिल हे बैलगाडीमधील कुटार खाली करत होते. त्यावेळी मो. कासम हे शेख आदिल यांचे घरासमोरच्या रस्त्यावरून जात होते. घराच्या आवारातून जाण्याबाबत संबंधितास हटकले असता, त्यांनी वाद घातला. सातही जणांनी शेख आदिल यांना आधी पकडून ठेवले नंतर त्यापैकीच एकाने आपल्या घरामधुन कीटकनाशक आणले. हे कीटकनाशक शेख आदिल यांना बळजबरीने पाजून त्यांची हत्या करण्याचा प्रयत्न झाला. सदर व्यक्तीची पत्नी सईदा बी शेख आदिल यांनी घटनास्थळी धाव घेतल्यावर सातही जणांनी तेथून पळ काढला, असा आरोप शेख आदिल उर्फ शेख चॉंद यांनी येवदा ठाण्यात दाखल तक्रारीत केला. त्याआधारे नमुद व्यक्तींविरुद्ध पोलिसांनी गुन्हा दाखल केला.