किसान सन्मान योजनेचा निधी घेणे पडले महाग, आता सातबारावर चढणार बोजा

यवतमाळ : पंतप्रधान किसान सन्मान योजनेचा लाभ घेणाऱ्या व आयकर भरणाऱ्या जिल्ह्यातील साडेचार हजार शेतकऱ्यांना नोटीस बजावण्यात आली आहे. त्यातील काही शेतकऱ्यांनी रक्कम भरली आहे. मात्र, ज्यांनी रकमेचा परतावा केला नाही, अशा शेतकऱ्यांच्या सातबारावर बोजा चढविला जाण्याची शक्‍यता आहे. 

हेही वाचा - Success Story : एकदाच केली दीड लाखांची गुंतवणूक आता...

केंद्र शासनाने पंतप्रधान किसान सन्मान योजना शेतकऱ्यांसाठी लागू केली. राज्यात फेब्रुवारी २०१९ पासून ही योजना राबविण्यास सुरुवात झाली आहे. या योजनेच्या माध्यमातून दोन हेक्‍टरपर्यंत लागवडीयोग्य क्षेत्र असलेल्या शेतकरी कुटुंबास प्रतिहप्ता दोन हजार रुपये याप्रमाणे तीन हप्त्यांचे सहा हजार रुपये असा लाभ देण्यात येतो. त्यासाठी शेतकऱ्यांनी माहिती अपलोड केली होती. मात्र, लाभ घेण्याच्या दृष्टीने आयकर, सरकारी अधिकारी, कर्मचारी, पेन्शनधारक, दोन हेक्‍टरपेक्षा अधिक जमीन असलेल्या शेतकऱ्यांनी संकेतस्थळावर माहिती भरली. या माहितीच्या आधारावर संबंधित शेतकऱ्यांना योजनेचा लाभसुद्घा देण्यात आला. अशा शेतकऱ्यांकडून शासनाने आता वसुली सुरू केली आहे. 

हेही वाचा - वसुलीबाज शाळांविरुद्ध 'अ‌ॅक्शन प्लॅन', आतापर्यंत फक्त पाच शाळांना वसुलीची नोटीस

लाभ देण्यात आलेल्यांपैकी ४ हजार ६४६ शेतकरी आयकर भरणारे निघाले आहेत. त्यांच्या खात्यात तब्बल ४ कोटी १८ लाख रुपयांचा निधी टाकण्यात आल्याची बाब समोर आली. अशा शेतकऱ्यांना जिल्हा प्रशासनाकडून नोटीस बजावत आली आहे. लाभ घेतलेली रक्कम त्वरित भरावी, अशा सूचना जारी करण्यात आल्या आहेत. त्यातील मोजक्‍याच शेतकऱ्यांनी ४७ लाखांहून अधिक रक्कम शासनाकडे जमा केली आहे. अजूनही उर्वरित शेतकरी उचल केलेला हप्ता परत देण्यास तयार नाहीत. त्यामुळे आता प्रशासन कारवाईच्या तयारीत आहे. ज्या शेतकऱ्यांनी रक्कम भरली नाही, अशा शेतकऱ्यांच्या सातबाऱ्यावर बोजा चढविण्याची शक्‍यता वर्तविली जात आहे.