अमरावतीतील बाळाचे मृत्यूप्रकरण : आईने हत्येचे कबुली दिली नाही; गूढ अद्यापही कायम

अमरावती : न्यू प्रभात कॉलनीतील दीड महिन्याच्या बाळाच्या हत्येप्रकरणी अटक करण्यात आलेल्या आई नम्रता यांच्या पोलिस कोठडीची मुदत मंगळवारी संपली. त्यामुळे त्यांना पुन्हा न्यायालयासमोर हजर करण्यात आले. यावेळी न्यायालयाने त्यांना न्यायालयीन कोठडी सुनावली. तीन दिवसांच्या पोलिस कोठडीनंतरही नम्रताने मुलाच्या हत्येची कबुली दिलेली नाही. त्यामुळे बाळाच्या हत्येमागचे गूढ अद्यापही कायम आहे.

नम्रता यांचे दीड महिन्याचे बाळ बेपत्ता झाल्याची तक्रार २९ नोव्हेंबर रोजी राजापेठ ठाण्यात दाखल करण्यात आली होती. दरम्यान ३० नोव्हेंबर रोजी घराच्या अंगणातील विहिरीतच बाळाचा मृतदेह आढळून आला होता. विहिरीवर लोखंडी जाळीचे आवरण असून एका बाजूने छोटेसे दार आहे. सदर दार बाजूला करून बाळाला अलगद विहिरीत टाकण्यात आल्याचे पोलिसांच्या निदर्शनास आले होते.

अधिक माहितीसाठी - राणे दाम्पत्य आत्महत्या प्रकरणाचे गूढ उकलले : कुत्र्याचे इंजेक्शन देऊन पत्नीने केला पती, मुलांचा खून

परंतु, सदर कृत्य करण्यामागे काय कारण दडले आहे, याचा उलगडा अद्यापही झाला नाही. दरम्यान, तपासात बाळाला काही आजार असल्याची माहिती पोलिसांच्या हाती लागली आहे. त्यामुळे नम्रताने हे कृत्य केल्याचा संशय पोलिसांनी व्यक्त केला. परंतु, तीन दिवसांच्या पोलिस कोठडीत तिने ‘ना’चाच पाढा वाचल्याने अद्याप तरी या धक्कादायक घटनेमागील गूढ उकललेले नाही.

संपादन - नीलेश डाखोरे

विदर्भातल्या ताज्या बातम्यांसाठी क्लिक करा