Amravati Crime : शहरात ५०० रुपयांच्या २० बनावट नोटा आढळल्या

अमरावती : शहरात मोठ्या प्रमाणावर पाचशे रुपयांच्या बनावट नोटा चलनात येत असल्याची धक्कादायक माहिती उघडकीस आली. याप्रकरणी शहरातील खोलापुरी गेट पोलिस ठाण्यात अनोळखी व्यक्तींविरुद्ध गुन्हा दाखल करण्यात आला.

शहरातील सराफा बाजार परिसरात सुवर्णकारांची इतर व्यापाऱ्यांची सोने खरेदी विक्रीची दुकाने आहेत. बहुतांश व्यापाऱ्यांची येथील बडोदा बॕंक शाखेमध्ये खाती असल्याने दररोज लाखो रुपयांची उलाढाल केल्या जाते. १६ एप्रिल २०२४ रोजी याच भागातील दोन सुवर्णकारासह अन्य एक व्यापारी अशा तिघांनी टप्प्याटप्प्याने २५ लाख रुपये, २५ हजार रुपये तर तिसऱ्या व्यापाऱ्याने ५ हजार रुपये अशा पद्धतीने नोटांचा भरणा खात्यात केला.

ज्यावेळी बँकेच्या रोखपालने संपूर्ण नोटा आणि दिवसभराचा व्यवहार तपासला त्यावेळी त्यामध्ये पाचशे रुपयांच्या एकूण २० नोटा म्हणजेच एकूण दहा हजार रुपयांच्या नोटा बनावट असल्याची बाब उघडकीस आली.

ज्या व्यापाऱ्याने २५ लाखाचा भरणा केला होता. त्याच्या नोटांच्या बंडाला मध्ये १४, ५०० रुपयाच्या नकली नोटा आढळल्या. तर २५ हजाराचा भरणा करणाऱ्यांच्या व्यापाऱ्यांच्या नोटांचे बंडलात तीन नकली नोटा तर पाच हजार रुपयांचा भरणा करणाऱ्या व्यापाऱ्यांचे बंडलमध्ये पाचशे रुपयांच्या काही नकली नोटा अशा एकूण वीस नकली नोटा आढळल्याची बाब उघडकीस आली. बँक प्रशासनासही व्यवस्थापक शशिकांत वारके यांनी खोलापुरी गेट पोलिस स्टेशन मध्ये शुक्रवार ता. ३ मे रोजी तक्रार दाखल केली.