नगराध्यक्षांसह ३१ जणांचा भाजपला रामराम, राष्ट्रवादीत घेणार प्रवेश

वाडी (जि. नागपूर) : भाजपचे माजी जिल्हा महामंत्री व वाडीचे नगराध्यक्ष प्रेम झाडे यांच्यासह ३१ स्थानीय प्रमुख पदाधिकारी व कार्यकर्त्यांनी राजीनामा दिला. पक्षाच्या पक्षपातीपणा व अन्यायकारक धोरणाचा निषेध करीत असल्याचे त्यांनी यावेळी सांगितले. त्यामुळे राजकीय वर्तुळात खळबळ उडाली आहे.

हेही वाचा - कुटुंब कल्याणाची जबाबदारी महिलांचीच का? सहा वर्षांत फक्त १,५४० पुरुषांनी केली नसबंदी

माजी नगराध्यक्ष प्रेम झाडे व वाडीतील भाजपचे पदाधिकारी म्हणून कार्य करणारे गणेश राठोड, हिम्मत गडेकर, प्रकाश जुनघरे, मोहन खंडारे, जटाशंकर पांडे यांनी सोमवारी चर्चा व निवेदनाच्या माध्यमातून हा निर्णय घेतला. तसेच पक्षाच्याच आमदार व पदाधिकाऱ्यांनी उघडपणे ज्येष्ठ व कट्टर पदाधिकाऱ्यांवर अन्याय करण्यात आला. त्यानंतर ही बाब स्पष्ट करूनही आमदार समीर मेघे यांच्या दबावाखाली ज्येष्ठ जिल्हा पदाधिकाऱ्यांनी आतापर्यंत कोणतीही कारवाई केली नाही. हे चिंताजनक असल्यामुळे हा निर्णय घेत असल्याचे त्यांनी सांगितले. 

हेही वाचा - तुम्हाला ‘ड्रॉ’मध्ये लागलेली कार पाहिजे की १४ लाख?...

विविध आंदोलने, मोर्चे, वाडीबंदसारखे प्रमुख विषय घेऊन झाडेंनी पक्षाला परिसरात क्रियाशील ठेवले होते. परंतु, गेल्या काही दिवसांपासून आमदार मेघे व त्यांच्यात वेळीवेळी मतभेद झाले. वाडीतील दवाखान्याच्या मंजुरीसाठी प्रलंबित प्रस्ताव याचाही आमदारांनी पाठपुरावा मंत्रालय स्तरावर केला नसल्याचे ते म्हणाले. त्यामुळे आजही वाडीतील एक लाख जनता आरोग्य सुविधेसाठी वंचित असल्याचा आरोप झाडे यांनी केला. आमदार स्वतः भाजपचे असूनही हेतुपुरस्सर त्यांच्या वार्डला या निधीपासून वंचित ठेवण्यात आले. दरम्यान, एका लाच प्रकरणातही आमदारांची भूमिका संशयास्पद असल्याची भूमिका तक्रारकर्त्यांकडूनच उघड झाल्याने वाडीतील पदाधिकाऱ्यांमध्ये तीव्र असंतोष निर्माण झाला. या सर्व बाबींचा अहवाल जिल्हा भाजपच्या वरिष्ठ पदाधिकाऱ्यांना प्रत्यक्ष भेटून, निवेदन देऊन वारंवार सांगून कार्यवाही व न्याय मिळाला नाही. ३१ पदाधिकाऱ्यांनी नुकतीच भाजपचे जिल्हाध्यक्ष अरविंद गजभिये यांना भेटून स्थितीची कल्पना देऊन राजीनामे सादर केले. यावर दोन दिवसात योग्य कार्यवाही करण्याचे आश्वासन देऊनही आज चार दिवस झाल्यानंतर त्यांनी कोणतीही कार्यवाही केली नसल्याचे झाडे यांनी सांगितले. लवकरच राष्ट्रवादी पक्षात प्रवेश करणार असल्याचा मानसही त्यांनी व्यक्त केला.