Buddha Purnima 2024 : बुद्ध जयंतीनिमित्त आज बनवणार विश्वविक्रमी २,५८६ किलो खीर

Buddha Purnima 2024 : दोन हजार लिटर दूध, तिनशे किलो साखर, ५० किलो काजू, ५० किलो बदाम, ५० किलो मनुका, २० किलो चारोळी आणि २० किलो खोबरा किस या पोषक पदार्थाच्या मिश्रणातून दोन हजार ५८६ किलोंची खीर उपराजधानीत तयार होणार आहे. तथागत सिद्धार्थ गौतम बुद्ध यांच्या २ हजार ५८६ व्या जयंतीचे औचित्य साधून हा विश्वविक्रम नोंदविण्यासाठी सदर उपक्रम असल्याची माहिती चक्रवर्ती फाउंडेशन, भीम वादळ या संघटनेचे प्रतीक इंदूरकर यांनी दिली.

उत्तर नागपुरातील बेझनबाग पटांगणावर जागतिक स्तरावरचा विक्रम नोंदविण्यासाठी आज, २३ मे रोजी खीर उपक्रमाचा संकल्प केला आहे. सोबतच ५०० भिख्खूंच्या उपस्थितीत २४ तासांचा महापरित्रणपाठ याच पटांगणावर होईल. बौद्ध धर्मातील सर्व सुत्ताचे पठण भिक्खू संघ करेल. यासाठी ५०० बौद्ध भिक्खूच्या सहभागासोबतच राज्याच्या कानाकोपऱ्यातून बौद्ध उपासक उपस्थित राहणार असल्याचे इंदूरकर यांनी सांगितले.

आयोजन समितीचे प्रमुख प्रतीक इंदूरकर असून, समितीत गणेश चाचेरकर, भीम वादळ, जितू बनसोड, रवींद्र ठवरे, राकेश निकोसे, बाबू खान, निखिल वानखेडे, राज डोंगरे, उद्देश भिवगडे, संजिवनी मंच, मानव अधिकार संरक्षण मंच, अंकित राऊत समिती सदस्य आहेत.

खिरीचे विहारांमध्ये वाटप

नागपुरातील प्रत्येक विहारातून बौद्ध भिक्खू येणार आहेत. बौद्ध उपासक व उपासिका सहभागी होतील. या जयंती सोहळ्यात नागपूर शहरातील बौद्ध उपासक सहभागी होती. तर नागपुरातील प्रत्येक बुद्ध विहारात संघटनेच्या कार्यकर्त्यांच्या मदतीने खीर वितरणाचा कार्यक्रम होणार आहे.