Crime: घरगुती वाद विकोपाला! संतापलेल्या सासऱ्याने सुनेच्या मानेवार कुऱ्हाडीने वार करत केली हत्या

मोहाडी: घरगुती वाद विकोपाला गेल्याने संतापलेल्या सासऱ्याने सुनेच्या मानेवारी कुऱ्हाडीने वार करून खून केल्याची घटना मोहाडी तालुक्यातील रोहणा येथे घडली. ही घटना शुक्रवारी सकाळी साडेआठच्या सुमारास घडली.

मृत सुनेचे नाव प्रणाली ऊर्फ पिंकी सतीश ईश्वरकर (वय ३०) असून आरोपी सासऱ्याचे नाव बळवंत रघू ईश्वरकर (वय ५८) असे आहे.

रोहणा येथील मृताच्या पतीचे गावातील चौकात किराणा दुकान असून तो सकाळी दुकानात गेला होता. सासरा सकाळी शेतातून दूध घेऊन घरी आला. तेव्हा सून पिंकी अंगणात भांडे घासत होती.

दरम्यान दोघांमधील वाद विकोपाला गेल्याने सासऱ्याने पिंकीच्या मागून मानेवर कुऱ्हाडीने वार केला. यात पिंकीचा जागीच मृत्यू झाला. त्यावेळी घरात इतर कोणीही नव्हते. त्यानंतर आरोपीने स्वत: मोहाडी येथे जाऊन पोलिसांसमोर आत्मसमर्पण करून सुनेचा खून केल्याची कबुली दिली.

आरोपी गेल्यानंतर अंगणात मृतदेह तसाच पडून होता. काही वेळाने लहान मुले खेळता खेळता अंगणात आले असता त्यांना पिंकी रक्ताच्या थारोळ्यात पडलेली दिसली.

जवळ असलेल्या भांड्यांवरही रक्ताचे शिंतोडे उडाले होते. तेव्हा लहान मुलांनी याबाबतची माहिती पिंकाच्या पतीला दिली.

त्यानंतर सतीश घरी आल्यावर या घटनेची माहिती गावात पसरली. मोहाडी पोलिसांनी घटनास्थळाचा पंचनामा करून मृतदेह शवविच्छेदनासाठी ग्रामीण रुग्णालयात पाठविला. मृत पिंकीला ३ वर्षाचा मुलगा आहे.

सासऱ्याने रागाच्या भरात केलेल्या कृत्यामुळे ३ वर्षाचा मुलगा आईविना पोरका झाला आहे. मोहाडी पोलिसांनी आरोपीला अटक करून त्याच्या विरोधात खुनाचा गुन्हा दाखल केला आहे. पुढील तपास ठाणेदार पुल्लरवार व त्यांची चमू करीत आहे.