अपहरण करून अल्पवयीन मुलीवर सामूहिक बलात्कार

नागपूर : अल्पवयीन मुलीचे अपहरण करून तिच्यावर सामूहिक अत्याचार केल्याची खळबळजनक घटना गुरुवारी (ता.१०) रात्री अंबाझरी ठाण्यांतर्गत उघडकीस आली. या प्रकरणात पाच ते सहा जणांचा सहभाग असून पोलिस त्यांचा शोध घेत आहेत. तीन दिवसांपूर्वी लावा परिसरातही महिलेच्या घरात घुसून सामूहिक बलात्कार केल्याची घटना घडली होती.

पोलिसांकडून मिळालेल्या माहितीनुसार, पीडित मुलगी अंबाझरी ठाण्यांतर्गत राहते. काही दिवसांपूर्वी तिची फेसबुकवर एका तरुणाशी मैत्री झाली. २ फेब्रुवारीला तरुणाने तिला रविनगर चौकात भेटायला बोलावले. तेथून तिला जाफरनगर येथील एका फ्लॅटमध्ये घेऊन गेला. तिथे दोघांनी पार्टी केली. यानंतर तिच्यावर जबरीने अत्याचार केला. काही वेळाने त्या तरुणाचा एक साथीदार फ्लॅटमध्ये आला. त्यानेही तरुणीवर अत्याचार केला. अशाप्रकारे ५ ते ६ तरुणांनी आळीपाळीने तिचे शोषण केले. यामुळे तरुणी घाबरली होती. गुरुवारी सायंकाळी तिने हिंमत करून अंबाझरी पोलिसात तक्रार केली.

सामूहिक अत्याचाराची माहिती मिळताच डीसीपी विनिता साहू ठाण्यात पोहोचल्या. तरुणीकडून घटनेची पूर्ण माहिती घेतली. याशिवाय पोलिस आयुक्तांनीही भेट देत प्रकरणाची माहिती घेतली. दरम्यान, मुलीचे वय १७ वर्षे ८ महिने असल्याची माहिती असून त्याचीही पडताळणी करण्यात येत असल्याची माहिती त्यांनी दिली. लवकरच आरोपी ताब्यात असतील, असा विश्‍वासही त्यांनी व्यक्त केला. पोलिसांनी आरोपींविरुद्ध गुन्हा नोंदवून शोध सुरू केला आहे.

अत्याचारापूर्वी घेतली दारू

अल्पवयीन मुलीवर अत्याचार करण्यापूर्वी सर्व मित्रांनी दारू पिल्याची माहिती सूत्रांनी दिली. युवकाने अमरावती मार्गावरुन मुलीला बाईकवरून फ्लॅटवर नेले. तिथे मुलगी आणि युवकाने पार्टी केली. त्यानंतर तिच्यावर पाच ते सहा मित्रांनी अत्याचार केल्याचे समजते.