Potato Chips : बटाट्याचे चिप्स आता सोलर मशीनमधून

नागपूर : आधुनिक काळातील फराळामध्ये बटाट्याचा चिप्स हा अविभाज्य भाग मानला जातो. उपवास असो, कॉर्पोरेट क्षेत्रातील बैठका असोत किंवा करीच्या दिवशी होणारी पार्टी असो. इतर पदार्थांचा ताटामध्ये समावेश नसला तरी बटाट्याचे चिप्स नक्कीच असतात.

या चिप्सचे निर्मिती मूल्य आणि उत्पादनासाठीची मेहनत आता कमी होणार आहे. कारण, विश्‍वेश्‍वरय्या राष्ट्रीय अभियांत्रिकी संस्थे(व्हिएनआयटी)च्या भौतिकशास्त्र विभागाचे आलोक कुमार, मनु कुमार या विद्यार्थांनी प्रा. डॉ. सुषमा गिरीपुंजे यांच्या मार्गदर्शनात सोलर पॅनलचा आधार घेत चिप्स बनविणाऱ्या यंत्राची निर्मिती केली आहे.

केवळ तीन ते चार हजार रुपयांत हे यंत्र बनविले आहे. तर, दोन बॅटरीचा वापर करण्यात आल्याने सलग चार ते सहा तास हे यंत्र चालते. दुचाकीची बॅटरी सातशे रुपयांत मिळते. त्यामुळे, भविष्यातील देखभाल खर्चसुद्धा आवाक्यात असणार आहे. उद्योगी लोकांना सोईस्कर ठरावे म्हणून यावर अजून संशोधन सुरू आहे. आकारात अत्यंत लहान असल्याने घराच्या कोपऱ्यात चिप्सचा उद्योग सुरू करता येणार आहे.

ग्रामीण भाग आणि प्रामुख्याने ग्रामिण भागातील महिलांना डोळ्यापुढे ठेवत या यंत्राची निर्मिती केली आहे. भविष्यात रोजगाराचे साधन म्हणून या यंत्राकडे पाहिले जावे, म्हणून आम्ही प्रयत्नरत आहोत. यंत्र वापरात येताच पेटंट मिळविण्यासाठी आम्ही अर्ज करणार आहोत.

-डॉ. सुषमा गिरीपुंजे, विश्‍वेश्‍वरय्या राष्ट्रीय अभियांत्रिकी संस्था